ភ្នំពេញ៖ ក្រុមអត្តពលិកមានពិការភាពកម្ពុជា បង្កើនការហ្វឹកហាត់កាន់តែខ្លាំងក្លា ក្នុងពេលបច្ចុប្បន្ននេះ។ ពួកគេតាមប្រភេទកីឡានីមួយៗសុទ្ធតែបង្កើនម៉ោងហ្វឹកហាត់ និងមាន​ក្រុមប្រភេទកីឡាខ្លះ ហ្វឹកហាត់រៀងរាល់ថ្ងៃដោយលែងមានការឈប់សម្រាក​ទាល់តែសោះ។

ខណៈការប្រកួតស៊ីហ្គេម និងអាស៊ានប៉ារ៉ាហ្គេមកាន់តែខិតចូលមកដល់ ការហ្វឹកហាត់របស់​គ្រប់​អត្តពលលិកគឺកាន់តែមានភាពខ្លាំងក្លា។ ជាក់ស្ដែងសម្រាប់ក្រុមអត្តពលលិកមានពិការភាព ដែល​នឹងចូលរួមប្រកួតក្នុងព្រឹត្តិការណ៍ ​អាស៊ានប៉ារ៉ាហ្គេម ក៏បានបង្កើនការហ្វឹកហាត់​តាមរយៈការថែម​ម៉ោង និងមានការសម្រុកហាត់ដោយលែងមានការឈប់សម្រាកថែមទៀតផង។

បច្ចុប្បន្នសម្រាប់ក្រុមបាល់បោះនារី តាមការលើកឡើងរបស់លោកស្រី សៀង សុខច័ន្ទ ជាប្រធានក្រុម បានបញ្ជាក់ឱ្យដឹងថា ការហ្វឹកហាត់របស់ក្រុមខ្លួន គឺមិនមានការឈប់សម្រាក​ទៀតនោះទេ។ ការហ្វឹកហាត់ ធ្វើឡើងរៀងរាល់ថ្ងៃទោះបីជាថ្ងៃអាទិត្យ ក៏ហ្វឹកហាត់ដែរ។ លើសពីនេះទៅទៀត ក្រុមបាល់បោះនារី ក៏ទទួលបានមេរៀនបន្ថែមពីគ្រូជំនាញបរទេស សម្រាប់​ការហ្វឹកហាត់បបន្ថែមរៀងរាល់ថ្ងៃផងដែរ។ ក្នុងនាមជាប្រធានក្រុម លោកស្រីមាន​ការជឿជាក់យ៉ាង​មុតមាំ ក្នុងការការពារមេដាយមាស ​ដែលក្រុមខ្លួនទទួលបានកាលពីឆ្នាំមុនឱ្យបាន។

ចំពោះក្រុម បាល់ទះទាំងបុរស និងនារីវិញ បច្ចុប្បន្នក៏បានថែមម៉ោងហ្វឹកហាត់​ កាន់តែច្រើនផងដែរ សម្រាប់ការដណ្ដើម ​និងការពារមេដាយមាសដែលក្រុមខ្លួនធ្លាប់ទទួលបាន។ ក្រោមការ​ហ្វឹកហាត់​កាន់តែខ្លាំងក្លាបែបនេះ ពួកគេមើលឃើញពីសមត្ថភាពក្រុមកាន់តែប្រសើរ និងមានភាពជឿជាក់​កាន់តែខ្លាំង ក្នុងការប្រកួតផងដែរ។

គួរបញ្ជាក់ថា ព្រឹត្តិការណ៍ អាស៊ានប៉ារ៉ាហ្គេម នឹងរៀបចំឡើងក្រោយ ព្រឹត្តិការណ៍ស៊ីហ្គេម​បាន​បិទបញ្ចប់។ ចំពោះប្រភេទកីឡា គឺមានចំនួន ១៣ប្រភេទ ក្នុងនោះរួមមាន បាល់បោះ អត្តពលកម្មជនពិការ វាយសីជនពិការ បាល់ទាត់ចលករខួរក្បាល ប៊ូស្យា កីឡាអុកជនពិការ យូដូជនពិការ លើកទម្ងន់ជនពិការ បាល់ទះអង្គុយ ហែលទឹកជនពិការ វាយកូនសីលើតុជនពិការ បាល់ទះ រួមទាំងបាល់ទាត់ជនពិការភ្នែកផងដែរ៕អត្ថបទ៖ គឹម ហុក