ភ្នំពេញ៖ ក្រសួងកិច្ចការនារី គ្រោងរៀបចំឲ្យមានមជ្ឈមណ្ឌលសហគ្រិនស្រ្តី ដើម្បីជំរុញសហគ្រិន​ស្រ្តីក្នុង​សហគ្រាសធុនតូច និងមធ្យម បានសិក្សារៀនសូត្របន្ថែម ការស្វែងយល់បទពិសោធន៍​រវាងគ្នាទៅវិញទៅមក និងការជួយដល់សហគ្រិនស្រី្តថ្មី អាចបង្កើតនូវមុខរបរ ដើម្បីពង្រីក​កាលានុវត្តភាព​សហគ្រិនស្ត្រីក្នុងបរិបទសេដ្ឋកិច្ច ​និងធុរកិច្ចឌីជីថល នៃការអភិវឌ្ឍក្នុងអាជីវកម្ម​។

លោកជំទាវកត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី ក្នុងជំនួបពិភាក្សាជាមួយ ឯកឧត្តម UENO Atsushi ឯកអគ្គរាជទូតជប៉ុនប្រចាំកម្ពុជា នៅថ្ងៃទី២០ ខែមេសា ឆ្នាំ២០២៣ បានលើកឡើងថា​​ ក្រសួងមានគម្រោងបង្កើតមជ្ឈមណ្ឌលសហគ្រិនស្រ្តី ​នៅអគារកុលាប អតីតក្រសួងកិច្ចការនារីចាស់ ដើម្បីជំរុញសហគ្រិនស្រ្តីក្នុងសហគ្រាសធុនតូច ​និងមធ្យម ពង្រីកកាលានុវត្តភាព​សហគ្រិនស្ត្រី​ក្នុងបរិបទសេដ្ឋកិច្ច និងធុរកិច្ចឌីជីថល ​នៃការអភិវឌ្ឍក្នុងអាជីវកម្ម។

លោកជំទាវកត្តិបណ្ឌិត អ៊ឹង កន្ថាផាវី បានបញ្ជាក់ថា ការពង្រីកកាលានុវត្តភាពសហគ្រិនស្ត្រីក្នុង​បរិបទ​សេដ្ឋកិច្ច និងធុរកិច្ចឌីជីថល គឺជារឿងចាំបាច់ និងសំខាន់ណាស់ ដើម្បីគាំទ្រដល់ការអភិវឌ្ឍ​ក្នុងអាជីវកម្មរបស់សហគ្រិនស្ត្រីឲ្យមានការរីកចម្រើន ជាក់ស្តែងនាកន្លងមកនេះរាជរដ្ឋាភិបាល និងដៃគូពាក់ព័ន្ធ បានដាក់ចេញនូវវិធានការ គំនិត​ផ្តួចផ្តើម ​និងកម្មវិធីគាំទ្រនានា ដោយបាន​កំពុងផ្តល់​នូវអត្ថប្រយោជន៍ដល់ស្ត្រីជាសហគ្រិន​ និងអាជីករផងដែរ។

ជាការឆ្លើយតប ឯកឧត្តម UENO Atsushi ឯកអគ្គរាជទូជប៉ុនប្រចាំកម្ពុជា បានសម្តែងនូវការរីករាយ​ជាអនេក និងបានថ្លែងនូវការគាំទ្រទំហឹងចំពោះកម្ពុជា ​ជាពិសេសក្រសួងកិច្ចការនារី លើការពង្រឹង​ភាពអង់​អាចផ្នែកសេដ្ឋកិច្ចដល់ស្រ្តី ក៏ដូចជាសមភាពយេនឌ័រជាដើម ក្នុងនោះប្រសិន​ក្រសួងមាន​គម្រោងជាក់លាក់ណាមួយ ក្នុងគោលដៅលើកម្ពស់ដល់ស្រ្តី សហគ្រិនស្រ្តី ក្រសួងកិច្ចការនារី អាចធ្វើការស្នើរសុំមកកាន់ជប៉ុនបានគ្រប់ពេលវេលា ដើម្បីផ្ញើរទៅរាជរដ្ឋាភិបាល សម្រេច និងអនុម័តផ្តល់ជូន៕អត្ថបទ៖ សុន រ៉ាឌី