ភ្នំពេញ៖ ក្រុមសិល្បករ សិល្បការិនី សរុបប្រមាណ ៣៣០០នាក់ ក្នុងនោះ មានក្រុមសិស្សក្មេងៗ ជិត៦០០នាក់របស់សាលាមធ្យមវិចិត្រសិល្បៈ បាន​បង្កើនហាត់សម របាំសិល្បៈ ការដើរចូលជា​ក្បួនគ្នា បង្ហាញទម្រង់សិល្បៈជានានាត្រៀមបើកព្រឹត្តិការណ៍ប្រកួតកីឡាSEA GAMES លើកទី៣២ និងASEAN PARA GAMES លើកទី១២ ខណៈថ្ងៃបើកគឺនៅសល់១៤ថ្ងៃទៀតនោះទេ នឹង​ឈាន​ចូលមកដល់។

បើតាមក្រុមសិល្បៈមកពីសាលាមធ្យមវិចិត្រសិល្បៈ បានថ្លែងប្រាប់BTV ថា នៅពេលនេះ ក្រុមសិល្បៈទាំងអស់គ្នា បានបង្កើនការហាត់សមបង្ហាញសិល្បៈខ្មែរប្លែកៗជាច្រើនទម្រង់ នៅ​លើទីលានជាក់ស្តែង រហូតដល់ម៉ោង១០យប់ ដើម្បីត្រៀមបើកព្រឹត្តិការណ៍ប្រកួតកីឡាSEA GAMES ដែលមកដល់ថ្ងៃទី២១ ខែមេសានេះ គឺនៅសល់ប្រមាណតែ ១៤ថ្ងៃទៀតប៉ុណ្ណោះ។

បើតាម ឯកឧត្តម ហេង កំសាន្ត នាយកសាលាមធ្យមសិក្សាវិចិត្រសិល្បៈ បានថ្លែងថា រហូតមក​ដល់នេះ ក្រុមសិល្បៈសាលាមធ្យមវិចិត្រសិល្បៈ ជាង៥៨០នាក់ បាននាំគា្នហាត់​សមឈាន​ដល់ដំណាក់កាល ​ការហាត់ដើរចូលក្បួនរួមគ្នានៅលើទីលានជាក់ស្តែង ជាមួយក្រុមសិល្បៈកងទ័ព​កង​យោធពលខេមរភូមិន្ទជាច្រើនរូប ដែលយើងមើលទិដ្ឋភាពរួមនឹងការដាក់​ភ្លើងពណ៌​នៅ​ពេលយប់ គឺមានភាពប្លែក​ស្អាត​អស្ចារ្យ​ ហើយនៅពេលនេះក្រុមសិល្បៈទាំងអស់គ្នា បានបង្កើន​ការ​ហាត់សម ដើម្បីឲ្យទិដ្ឋភាពសិល្បៈ នៅថ្ងៃបើកព្រឹត្តិការណ៍SEA GAMES គឺមានទិដ្ឋភាព​កាន់តែអស្ចារ្យ ហើយមានភាព​អច្ឆរិយ​ឧត្ដុង្គឧត្ដម​ក្រោមម្លប់សន្តិភាពរបស់កម្ពុជា។

ឯកឧត្ដម ទិត ថាវរិទ្ធ អនុរដ្ឋលេខាធិការក្រសួងវប្បធម៌ ​និងវិចិត្រសិល្ប: ក្នុងឱកាសជំនួប​សំណេះសំណាល​ជាមួយក្រុមសិល្បៈ ​បានថ្លែងថា ការហាត់​សម​សម្តែង​ទស្សនីយភាព​សិល្បៈសម្រាប់​ពិធីបើក ​ដែលមានរយៈពេលសម្តែងជិត១ម៉ោង ដែលមានបែងចែកជា៥វគ្គរួមមាន៖ សំដែង​ទស្សនីយភាព​សិល្បៈ ការកកើតទឹកដី, ភាពរុងរឿងនៃសម័យ, ស្នាមញញឹមខ្មែរ, អនាគត​កម្ពុជា, សហគម​ជោគវាសនា​តែមួយដែលមានសិល្បករសិល្បការិនីក្នុងប្រព័ន្ធ ក្រៅប្រព័ន្ធ សិស្ស និស្សិត និងកងទ័ពកងយោធពលខេមរភូមិន្ទ ចូលរួមសរុបជិត៣៣០០នាក់ ក្នុងនោះ​នារីជាង ៦០០នាក់​៕អត្ថបទ ស៊ុម សុខជា