ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ និងថ្នាក់ដឹកនាំ បានជួបពិភាក្សាជាមួយក្រុមការងារ KOICA (កយកា) អំពីគម្រោងសាងសង់មន្ទីរពិសោធន៍ជាតិ​សម្រាប់ត្រួតពិនិត្យគុណភាពសត្វ ​និងផលិតផលបសុព្យាបាល នៅទីស្តីការក្រសួង។

ប្រភពពីក្រសួងកសិកម្ម រុក្ខាប្រមាញ់ និងនេសាទ នៅរសៀលថ្ងៃទី២១ មេសា ឆ្នាំ២០២៣នេះ បានឲ្យដឹងថា នៅក្នុងជំនួបនាឱកាសនោះ ឯកឧត្តមរដ្ឋមន្ត្រី បានថ្លែងអំណរគុណចំពោះ កយកា ដែលបាននិងកំពុងចូលរួមចំណែកក្នុងការអភិវឌ្ឍវិស័យកសិកម្មនៅកម្ពុជា រួមទាំងគម្រោងសាងសង់​មន្ទីរពិសោធន៍ជាតិ។

ទាក់ទងនឹងការងារនេះ ឯកឧត្តម បានស្នើឱ្យកយកា ធ្វើការសិក្សាឱ្យបានច្បាស់លាស់ទាំង​លើ​សេវាកម្ម ឧបករណ៍/សម្ភារៈ និងធនធានមនុស្សសម្រាប់មន្ទីរពិសោធន៍ជាតិថ្មី ឱ្យមានកម្រិតស្តង់ដាអន្តរជាតិ។

ឯកឧត្តមបន្ថែមថា ទីតាំងគម្រោងមន្ទីរពិសោធន៍ជាតិនេះស្ថិតនៅឃុំសិត្បូ ខេត្តកណ្ដាល ជា​ទីតាំងល្អ​ដែលអាចជួយ​បញ្ចៀស​ហានិភ័យ​ក្នុងករណីមានបញ្ហាណាមួយដែលអាចប៉ះពាល់ដល់ទីប្រជុំជន។ យ៉ាងណាមិញមន្ទីរពិសោធន៍ធំ និងមន្ទីរពិសោធន៍តំបន់ ត្រូវមានទំនាក់ទំនងសហការល្អនឹងគ្នា ដើម្បីធ្វើការងារឱ្យបានរហ័ស​ និងទាន់ពេលវេលាក្នុងការផ្តល់សេវាសាធារណៈទូទាំងប្រទេស។

ឯកឧត្តមរដ្ឋមន្ត្រី ​មានប្រសាសន៍ថា មន្ទីរពិសោធន៍នៃអនុវិស័យទាំងអស់មានសត្វ ដំណាំ និង​ជលផល ត្រូវធ្វើឡើងនៅកន្លែងតែមួយដើម្បីភាពងាយស្រួល ដោយមិនចង់ឱ្យមានក្រុមការងារ​ផ្សេងៗគ្នាឡើយ ហើយការងារនេះក៏ជាអាទិភាពរបស់ KOICA ផងដែរ។

ឯកឧត្តមបន្តថា វាជាការចាំបាច់ដែលត្រូវពិភាក្សាគ្នា សហការគ្នា ធ្វើការជាមួយគ្នា និងប្រើប្រាស់​ថវិកាឱ្យត្រូវគោលដៅ ​ធ្វើទំនើបកម្ម មានប្រសិទ្ធភាព និរន្តរភាព តាមរយៈការបង្កើតមន្ទីរពិសោធន៍​ស្តង់ដាដែលជាទិសដៅថ្មីរបស់ក្រសួង ដើម្បីផ្តល់សេវាសាធារណៈលើផ្នែកសុវត្ថិភាពចំណីអាហារ ដោយក្រសួងចង់ឱ្យមានអគារ៣ផ្នែក ​គឺរដ្ឋបាល ​សេវាសុវត្ថិភាពចំណីអាហារ និងរោគវិនិច្ឆ័យ​និងជំងឺឆ្លង។

សូមជម្រាបថា គម្រោងសាងសង់មន្ទីរពិសោធន៍ជាតិ ផ្ដួចផ្ដើម​ឡើង​ដើម្បីពង្រឹងសមត្ថភាពត្រួត​ពិនិត្យ​សុវត្ថិភាព និងអនាម័យផលិតផលសត្វនៅកម្ពុជា​ ដោយផ្តោតសំខាន់ទៅលើជំងឺបណ្តាល​មកពីចំណីអាហារ ​ការប្រឡាក់ប្រឡូកមេរោគ ​និងសារធាតុគីមី រួមទាំងកាកសំណល់បសុឱសថ នៅក្នុងផលិតផលសត្វ ដែលការងារនេះនឹងចូលរួមចំណែកក្នុងការលើក​កម្ពស់​សុខុមាលភាព​ជាតិ តាមរយៈការបរិភោគផលិតផលសត្វមានសុវត្ថិភាព​ និងគោលដៅការនាំចេញផលិតផលសត្វ៕