បញ្ញាសិប្បនិម្មិត(AI)មាននៅគ្រប់ទីកន្លែងនាពេលបច្ចុប្បន្ននេះ ហើយ AI នឹងរួមចំណែកកើនឡើងផងដែរនៅក្នុងខ្សែសង្វាក់ផលិតកម្មនាពេលអនាគត ។ 

YuMi គឺជារូបយន្តបំពាក់ដោយកម្មវិធី AIចុងក្រោយ ដែលផ្តល់ជូនដោយក្រុមហ៊ុនបច្ចេកវិទ្យាខ្នាតយក្ស Hewlett Packard Enterprise(HPE) របស់សហរដ្ឋអាមេរិក។ 

លោក Andy Longworth គឺជាស្ថាបត្យករទទួលបន្ទុកទិន្នន័យ និង AIរបស់ក្រុមហ៊ុន HPE បាននិយាយថា កម្មវិធីដែលបង្កើតឡើងដោយក្រុមហ៊ុនដៃគូ Aleph Alpha របស់ HPE ត្រូវបានរចនាឡើងដើម្បីធ្វើការជាមួយមនុស្ស មិនជំនួសឲ្យមនុស្សនោះទេ។ 

លោក Longworth និយាយប្រាប់ទូរទស្សន៍ CGTN Europe ថា អ្វីដែលពួកយើងកំពុងធ្វើ គឺពួកយើងកំពុងផ្លាស់ប្តូរកម្លាំងពលកម្មពីផ្នែកមួយនៃសមីការទៅផ្នែកមួយទៀតនៃសមីការ ។ លោកមិនយល់ឃើញវា ជាការកាត់បន្ថយការងារនោះទេ តាមវិធីជាច្រើន វានឹងបង្កើតការងារនៅតាមទីកន្លែងផ្សេងៗគ្នា ។ 

លោក Longworth បានធ្វើបទបង្ហាញខ្លីដល់ទូរទស្សន៍ CGTN ដើម្បីមើលថាតើវាធ្វើការតាមរបៀបណា។ បើសិនជាមានបញ្ហាជាមួយរូបយន្ត YuMi ប្រតិបត្តិករ អាចថតរូបរបស់រូបយន្ត រួចបញ្ជូនទៅកាន់សម្ព័ន្ធប្រទាក់ប្រព័ន្ធ។ 

ពេលវាត្រឡប់មកវិញ កម្មវិធី Aleph Alpha នឹងរៀបរាប់ពីអ្វីដែលវាកំពុងមើល និងសួរអ្នកប្រើថាតើមានបញ្ហាអ្វី។ ក្រោយមកអ្នកប្រើប្រាស់អាចសួរសំណួរពាក់ព័ន្ធនឹងបញ្ហា ដូចជាសួរថាតើដៃរបស់រូបយន្តត្រូវបានក្រិតតាមខ្នាតឬ?ទៅកាន់កម្មវិធីដែលនឹងផ្តល់ចម្លើយមកវិញភ្លាម ៕