ប្រព័ន្ធផ្សព្វផ្សាយរដ្ឋ KCNA បានរាយការណ៍នៅថ្ងៃសុក្រនេះថា ជំហររបស់ប្រទេសកូរ៉េខាងជើងជារដ្ឋអាវុធនុយក្លេអ៊ែរ នឹងនៅតែពុំអាចប្រកែកបាន ហើយប្រទេសនេះនឹងបន្តកសាងកម្លាំងរេបស់ខ្លួន រហូតដល់ការគំរាមកំហែងខាងយោធាពីសហរដ្ឋអាមេរិក និងសម្ព័ន្ធមិត្តរបស់ប្រទេសនេះ ត្រូវបានបំបាត់ចោល។ សុន្ទរកថាដោយរដ្ឋមន្ត្រីការបរទេសកូរ៉េខាងជើង លោកស្រី Choe Son Hui ដែលត្រូវបានដកស្រង់សំដី ធ្វើឡើងនៅក្នុងសេចក្តីថ្លែងការណ៍មួយ ដែលរិះគន់សហរដ្ឋអាមេរិក និងក្រុមប្រទេសមានឧស្សាហកម្មលូតលាស់ទាំង៧ឬ G7។

បណ្តារដ្ឋមន្ត្រីការបរទេសនៃក្រុមប្រទេសG7 បានថ្កោលទោសការសាកល្បងមីស៊ីលកាលពីថ្ងៃទី១៣ ខែ មេសា របស់ប្រទេសកូរ៉េខាងជើង នូវអ្វីដែលទីក្រុងព្យុងយ៉ាងនិយាយថា ជាមីស៊ីលបាលីស្ទីកអន្តរទ្វីបឥន្ធនៈរឹង និងបានជំរុញការរំសាយអាវុធនុយក្លេអ៊ែរ នៅចុងបញ្ចប់នៃកិច្ចប្រជុំរបស់ពួកគេ នៅក្នុងប្រទេសជប៉ុន កាលពីថ្ងៃអង្គារ។

ភាពតានតឹងបានកើនឡើងខ្លាំងជាច្រើនសប្តាហ៍ថ្មីៗនេះ ខណៈប្រទេសឯកោមួយនេះ បានបង្កើនសកម្មភាពយោធា និងបានគំរាម សកម្មភាពវាយលុកនិងអនុវត្តជាក់ស្តែង ខណៈកងកម្លាំងសហរដ្ឋអាមេរិក និងកូរ៉េខាងត្បូង ធ្វើសមយុទ្ធយោធានៅនិទាឃរដូវប្រចាំឆ្នាំ។

ប្រទេសកូរ៉េខាងជើង កំពុងមានប្រតិកម្មទាំងកំហឹងចំពោះសមយុទ្ធទាំងនោះ ដោយចាត់ទុកវាថាជាការហាត់សមសម្រាប់សង្គ្រាមនុយក្លេអ៊ែរ។ លោកស្រី Choe និយាយថា ជំហរប្រទេសកូរ៉េខាងជើងជាមហាអំណាចនុយក្លេអ៊ែរគឺជាដំណាល់ចុងក្រោយ និងមិនប្រែប្រួល ហើយនៅតែជាការពិតមិនអាចប្រកែកបាន ទោះបីជាទីក្រុងវ៉ាស៊ីនតោន និងប្រទេសលោកខាងលិចផ្សេងទៀតបដិសេធក៏ដោយ។