កាលពីថ្ងៃសៅរ៍ម្សិលមិញ ប្រជាពលរដ្ឋអ៊ីស្រាអែលរាប់ម៉ឺននាក់ នាំគ្នាដង្ហែក្បួនតាមដងផ្លូវនៅសប្តាហ៍ទី១៦ ជាប់ៗគ្នា ដើម្បីតវ៉ាប្រឆាំងនឹងផែនការរបស់រដ្ឋាភិបាលក្នុងការធ្វើកំណែទម្រង់ប្រព័ន្ធតុលាការ ។
បាតុកម្មទ្រង់ទ្រាយធំដែលបានផ្អាកកាលពីខែមុននេះ បានកើតមានឡើង ស្របពេលដែលប្រជាពលរដ្ឋអ៊ីស្រាអែល ត្រៀមប្រារព្ធថ្ងៃខួបអនុស្សាវរីយអ៊ីស្រាអែល ដែលរំឭកដល់អ្នកត្រូវបានសម្លាប់អំឡុងសង្រ្គាមអ៊ីស្រាអែល និងការវាយប្រហារភេរវកម្មផង និងប្រារព្ធទិវាឯករាជ្យជាតិអីស្រាអែលផង នៅសប្តាហ៍ក្រោយ ។
ដោយមានកាន់រូបថតមនុស្សជាទីស្រលាញ់របស់ពួកគេ គ្រួសារអ្នកបាត់បង់ជីវិត បានអុជទៀនធ្វើពិធីស្មឹងស្មាធិ៍នៅតាមផ្លូវឆ្ពោះទៅកាន់ទីលានបាតុកម្មទីក្រុងតែល អាវីវ ។
លោក Miri Pinchuk គឺជាជាងថតរូបវ័យ ៥៣ឆ្នាំម្នាក់ និយាយថា លោកធំដឹងក្តីឡើងគ្មានឪពុកនោះទេ ដោយសារតែឪពុករបស់លោកលះបង់ជីវិតដើម្បីប្រទេសមួយនេះ ដោយសារតែគាត់ក្រោកឈរដោយមានជំនឿថា វានឹងក្លាយជាប្រទេសឯករាជ្យមានលទ្ធិប្រជាធិបតេយ្យ ។
គួរឲ្យដឹងថា សំណើកំណែទម្រង់ប្រព័ន្ធតុលាការដែលនឹងផ្តល់ការគ្រប់គ្រងប្រកបដោយប្រសិទ្ធិភាពរបស់រដ្ឋាភិបាលលើការតែងតាំងចៅក្រមតុលាការកំពូល និងអនុញ្ញាតឲ្យសភាច្រានចោលការសម្រេចចិត្តណាមួយរបស់តុលាការនោះ បានធ្វើឲ្យកើតមានវិបត្តិក្នុងស្រុកធំបំផុតនៅក្នុងប្រវត្តិសាស្រ្តនាពេលបច្ចុប្បន្នរបស់អ៊ីស្រាអែល ៕អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
