កម្មវិធីស្បៀអាហារពិភពលោក(WFP) ប្រឈមនឹងរលកបន្ថែមទៀត នៃ​ជនភៀសខ្លួន​ស៊ូដង់​ដែល​ធ្វើ​ដំណើរ​ទៅកាន់ប្រទេសជិតខាងឆាដ ដើម្បីរត់គេចចេញពីជម្លោះរវាងកងទ័ពស៊ូដង់ និង​កង​កម្លាំង​គាំទ្រ​រហ័ស(RSF) ។ នោះបើយោងតាមការអះអាងរបស់របស់លោក Pierre Honnorat ដែលជាប្រធាន WFPស៊ូដង់ប្រចាំនៅប្រទេសឆាដ ។ 

ប្រជាពលរដ្ឋស៊ូដង់ប្រហែល ១០ម៉ឺនទៅ ២០ម៉ឺននាក់ បានឆ្លង​កាត់​ព្រំដែន​រួច​ទៅ​ហើយ​ចូល​ទៅក្នុ​ង​ប្រទេស​ឆាដ រយៈពេល១សប្តាហ៍ក្រោយសង្រ្គាមផ្ទុះឡើងនៅក្នុងទីក្រុង Khartoum និង​តំបន់​ផ្សេង​ទៀត​នៅក្នុងប្រទេសមួយនេះ ។

លោក Honnorat បាននិយាយប្រាប់ទីភ្នាក់ងារព័ត៌មានរ៉យទ័រថា វាច្បាស់ខ្លាំងណាស់ថា ពួក​យើង​រំពឹង​ថា​នឹង​មាន​រលកជនភៀសខ្លួនបន្ថែមទៀត។

លោក Honnorat បន្តទៀតថា ការមកដល់ថ្មីនឹងបន្ថែមពីលើជនភៀសខ្លួនស៊ូដង់មានស្រាប់ ៤០​ម៉ឺន​នាក់ ដែលបានរត់ភៀសខ្លួនចេញពីប្រទេសមួយនេះ អំឡុងសង្រ្គាមលើកមុន ហើយចំនួន​ជន​ភៀស​ខ្លួន​កាន់​តែ​មានច្រើននៅតាមជំរំជនភៀសខ្លួន ១៤កន្លែងនៅតាមព្រំដែន ។

លោក Honnorat និយាយថា WFPនឹងត្រៀមខ្លួនទទួលជនភៀសខ្លួនយ៉ាងហោច ១០ម៉ឺននាក់ ហើយ​វា​ប្រហែល​ជា​អាចមានចំនួនច្រើនជាងនេះ ដូច្នេះហើយពួកយើងត្រូវតែត្រៀមខ្លួនទុកជាមុន ។

នៅក្នុងទីក្រុង Khartoum មាននូវប្រជាពលរដ្ឋជាច្រើន បានជាប់ខ្លួននៅក្នុងផ្ទះរបស់ពួកគេ ក្រោម​ការ​ទម្លាក់គ្រាប់បែក និងក្រុមអ្នកប្រយុទ្ធដើរតាមផ្លូវ 

អ្នក​ដែលជាប់ខ្លួនក្នុងសង្រ្គាមមានទាំងជនបរទេសរាប់ពាន់នាក់ផងដែរ រួមទាំងបុគ្គលិកស្ថានទូត ក្រុមការងារជំនួយ និងក្រុមនិស្សិតនៅក្នុងទីក្រុង Khartoum និងកន្លែងផ្សេង​ទៀត​នៅ​ក្នុង​ប្រទេស​ស៊ូដង់ ដោយពួកគេពុំអាចចាកចេញបានឡើយ ៕

អត្ថបទ៖ សារ៉ាត់