ស្របពេលដែលអ្នកស្រុករកវិធីទប់ទល់នឹងកម្តៅក្តៅបំផុតនៅក្នុងប្រទេសថៃនារយៈពេលប៉ុន្មានសប្តាហ៍​កន្លងទៅ ប្រទេសមួយនេះ កាលពីថ្ងៃសៅរ៍ បានកត់ត្រា​នៅ​លើ​សទ្ទស្សន៍​សីតុណ្ហភាព​ខ្ពស់​បំផុត​ពុំ​ធ្លាប់​ដែល​មាន ៥៤អង្សាសេ ។

យោងតាម​ការអះអាងរបស់ក្រសួងឧតុនិយមថៃ បានឲ្យដឹងថា សីតុណ្ហភាព​ទូទៅ​នៅ​ក្នុង​ប្រទេស​ថៃ មានចម្លោះពី ៣៨ទៅ ៤២អង្សាសេកាលពីថ្ងៃសៅរ៍ ក្នុងនោះ​សីតុណ្ហភាព​ខ្ពស់​បំផុត​កើត​មាន​នៅ​ក្នុង​សង្កាត់ Bangna ស្ថិតនៅតំបន់ភាគខាងកើតរដ្ឋធានីបាងកក ។ 

អ្នកស្រី Amporn Supasert គឺជាអាជីវករលក់មាន់វ័យ ៦៧ឆ្នាំម្នាក់ និយាយថា គាត់ផឹកទឹក និង​ទឹកកក​ច្រើនណាស់ ។ ជួនកាល គាត់ចូលទៅសម្រាកនៅក្នុងហាងទំនើប 7-11(សែវ៉ិន-អ៊ិឡែវ៉ិន) ដើម្បី​គេចចេញពីកម្តៅ វាជួយគាត់បានខ្លះផងដែរ ។

ដោយឡែក លោក Chatchai Mordee គឺជាសមាជិកក្រុមប្រឹក្សា​ក្រុង​បាងកក​ដែលត្រួ​ត​ត្រា​សង្កាត់​ Bangna បាននិយាយថា ប្រជាពលរដ្ឋត្រូវបានណែនាំកុំឲ្យធ្វើសកម្មភាពខាងក្រៅ និង​ចៀស​វាង​ការធ្វើឲ្យផ្លាស់ប្តូរសីតុណ្ហភាពភ្លាមៗដូចជាផឹកទឹកត្រជាក់ក្រោយហាត់ប្រាណរួច ។ ពួក​គេ​គួរ​តែស្លៀកពាក់ស្តើងផងដែរ ។ 

សូមបញ្ជាក់ថា ប្រទេសថៃ បានចេញសេចក្តី​ប្រកាស​អាសន្ន​ពី​កម្តៅ​ខ្លាំង​បំផុត​នៅ​ក្នុង​ទី​ក្រុង​បាងកក កាលពីថ្ងៃសុក្រ ដោយ​ណែនាំ​ឲ្យ​ប្រជាពលរដ្ឋ​ឲ្យ​ប្រុង​ប្រយ័ត្ន​ចំពោះ​លទ្ធភាព​នៃ​ការ​កើត​មាន​ជំងឺ​ដាច់សរសៃឈាមខួរក្បាលដោយសារអាកាសធាតុក្តៅខ្លាំង ។ 

យោងតាមការអះអាងរបស់ទីភ្នាក់ងារឧតុនិយមថៃ បានឲ្យដឹងថា រលកកម្តៅនេះ ត្រូវបានគេរំពឹថា នឹងបន្តរយៈពេល ៧ថ្ងៃទៀត ៕ អត្ថបទ៖ សារ៉ាត់