កាលពីថ្ងៃសៅរ៍ម្សិលមិញ ប្រទេសហ្វីលីពីន និងចិន បានសន្យា​ធ្វើ​ការ​រួមគ្នា​​ ដើម្បី​ដោះ​ស្រាយ​ការ​ខ្វែង​គំនិត​គ្នា​នៅក្នុងសមុទ្រចិនខាងត្បូង ជាទីដែលប្រទេសទាំងពីរ បាន​អះអាង​សិទ្ធិ​គ្រប់​គ្រង​ប្រជែង​គ្នា ហើយនិងពង្រឹងទំនាក់ទំនងទ្វេភាគីឲ្យកាន់ស៊ីជម្រៅ។ 

 រដ្ឋមន្រ្តីការបរទេសហ្វីលីពីនលោក Enrique Manalo បាននិយាយ​ពេល​លោក​ចាប់​ផ្តើម​ជំនួប​ជា​មួយ​សម​ភាគី​ចិន​លោក Qin Gang នៅក្នុងទីក្រុងម៉ានីលថា ទំនាក់ទំនងរបស់​ទីក្រុង​ម៉ានីល​ជា​មួយ​ទីក្រុង​ប៉េកាំង លើសពីការខ្វែងគំនិតលើបញ្ហាសមុទ្រចិនខាងត្បូង។ 

ជាការ​ឆ្លើយ​តបចំពោះការលើកឡើងបែបនេះ លោក Qin និយាយថា ចិនត្រៀមខ្លួន​រួចរាល់​ក្នុង​ការ​ធ្វើ​ការ​ជាមួ​យហ្វីលីពីន ដើម្បីអនុវត្តន៍ចំណុចឯកច្ឆ័ន្ទរួមរវាងប្រទេសទាំង ២ និងដោះ​ស្រាយ​ការ​ខ្វែង​គំនិតគ្នាឲ្យ​បានត្រឹមត្រូវ ហើយនិងរួមគ្នា លើកកម្ពស់សន្តិភាព និងស្ថិរភាពនៅក្នុងតំបន់ និង​លើ​ពិភពលោក។ លោក Qin បានជួបសម្តែងការគួរសមជាមួយប្រធានាធិបតីហ្វីលីពីន Ferdinand Marcos ផងដែរ កាលពីថ្ងៃសៅរ៍ដដែលនោះ ។ 

 ដំណើរទស្សនកិច្ចរបស់រដ្ឋមន្រ្តីការបរទេសចិន បានកើតមានរយៈពេលប៉ុន្មានសប្តាហ៍ប៉ុណ្ណោះ ក្រោយ​ហ្វីលីពីនប្រកាសទីតាំងមូលដ្ឋានយោធាសហរដ្ឋអាមេរិក ៤កន្លែងបន្ថែមទៀត ក្នុងនោះ ២កន្លែងនៅ​ទិសខាងជើងទល់មុខនឹងកោះតៃវ៉ាន់ ៕អត្ថបទ៖ សារ៉ាត់