កាលពីថ្ងៃសៅរ៍ម្សិលមិញ ប្រទេសឥណ្ឌា បាន​បាញ់​បង្ហោះ​ដោយជោគ​ជ័យ​នូវ​យាន​ចម្លង​ផ្ទុក​ផ្កាយ​រណប​សិង្ហបុរី ២គ្រឿងទៅកាន់ទីអវកាសចេញពីទីតាំងបង្ហោះ Sriharikota របស់ខ្លួន ។ 

នៅក្នុង​បេសកកម្ម លើកទី៥៧នេះ យានចម្លង Polar Satellite Launch Vehicle-C55 បាន​ហោះ​ចេញ​ពី​មជ្ឈមណ្ឌលអវកាស Satish Dhawan Space Centre ដោយផ្ទុកផ្កាយរណប TeLEOS-2 និងផ្កាយរណប Lumelite-4 របស់សិង្ហបុរី ។ ផ្កាយរណបទាំង ២នេះ មានទម្ងន់ ៧៤១គ.ក និងទម្ងន់ ១៦គ.ក ។ 

 យោងតាមការអះអាងរបស់អង្គការស្រាវជ្រាវអវកាសឥណ្ឌា(ISRO) បានឲ្យដឹងថា ផ្កាយរណប TeLEOS-2 នឹងត្រូវប្រើ​ប្រាស់​​ ដើម្បី​គាំទ្រ​តម្រូវ​ការ​រូប​ភាព​ផ្កាយ​រណប​របស់​ទីភ្នាក់​ងារ​ជា​ច្រើន​នៅ​ក្នុ​​ងរដ្ឋាភិបាលសិង្ហបុរី ខណៈដែលផ្កាយរណប LUMELITE-4 ប្រើប្រាស់​ដើម្បី​បន្ថែម​សុវត្ថិភាព​នាវា​ចរណ៍​អេឡិចត្រូនិករបស់ប្រទេសមួយនេះ និងអត្ថប្រយោជន៍សហគមន៍ដឹកជញ្ជូនសកល។ 

សូមបញ្ជាក់ថា ឥណ្ឌា បានកសាងកេរ្តិ៍របស់ខ្លួនជាអ្នកបង្កើតផ្កាយរណបរូបភាពផែនដី និង​សមត្ថភាព​បាញ់​បង្ហោះពួ​កវាទៅកាន់គន្លេងតារាវិថីទាបៗ៕ អត្ថបទ៖ សារ៉ាត់