ក្រសួងការបរទេសរុស្ស៊ីនិយាយថា ទីក្រុងម៉ូស្គូ នឹងណែនាំឲ្យប្រជាពលរដ្ឋរបស់ខ្លួនចៀសវាងពីការធ្វើដំណើរទៅកាន់ប្រទេសកាណាដា ដោយពួកគេលើកឡើងពីហេតុផលករណីរើសអើងជាតិសាសន៍កើនឡើងមកលើពលរដ្ឋរុស្ស៊ី ដែលរួមទាំងអំពើហិង្សាលើរាងកាយ ។
កាណាដា ស្ថិតក្នុងចំណោមប្រទេសគាំទ្រខ្លាំងបំផុតដល់អ៊ុយក្រែន នៅក្នុងសង្រ្គាមប្រឆាំងជាមួយកងកម្លាំងទីក្រុងម៉ូស្គូ ហើយពួកគេបានដាក់ទណ្ឌកម្មលើមន្រ្តីរុស្ស៊ីរាប់រយនាក់ និងក្រុមហ៊ុនជាច្រើនទៀត ក៏ដូចជាបំរាមពាណិជ្ជកម្មទ្រង់ទ្រាយធំ។
ក្រសួងការបរទេសរុស្ស៊ី និយាយនៅក្នុងសេចក្តីជូនដំណឹងថា ដោយសារករណីរើសអើងជាតិសាសន៍កើនឡើងមកលើពលរដ្ឋរុស្ស៊ី នៅក្នុងប្រទេសកាណាដា រួមទាំងអំហិង្សាលើរាងកាយនោះ ពួកយើងសូមណែនាំឲ្យអ្នករាល់គ្នាចៀសវាងការធ្វើដំណើរទៅកាន់ប្រទេសមួយនេះ ក្នុងបំណងទេសចរណ៍ ការអប់រំ និងក្នុងបរិបទពាក់ព័ន្ធនឹងវិស័យធុរកិច្ច ។
សេចក្តីជូនដំណឹងដែលចុះកាលបរិច្ឆេតថ្ងៃទី ២០ ខែមេសា និងបានបង្ហោះនៅលើបណ្តាញព័ត៌មានសង្គម Telegramរបស់ក្រសួងការបរទេសរុស្ស៊ីកាលពីថ្ងៃសៅរ៍នេះ បន្តថា បើសិនជាអ្នកនៅប្រទេសកាណាដារួចស្រាប់ទៅហើយ ពួកយើងសូមជំរុញឲ្យអ្នកប្រុងប្រយ័ត្ន ពិសេសនៅតាមទីកន្លែងសាធារណៈ ។
ក្រសួងការបរទេសកាណាដា មិនអាចសុំសេចក្តីអធិប្បាយភ្លាមៗបាននោះទេ ជុំវិញការលើកឡើងរបស់ក្រសួងការបរទេសរុស្ស៊ី ។
កាលពីសប្តាហ៍មុន រុស្ស៊ី បានដាក់ទណ្ឌកម្មលើក្រុមមន្រ្តី និងឥស្សរជនសាធារណៈកាណាដា ៣៣៣រូប ដើម្បីឆ្លើយតបនឹងការរឹតត្បិតរបស់កាណាដា ទៅលើទីក្រុងម៉ូស្គូ និងការគាំទ្រអ៊ុយក្រែន ៕ អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
