ប្រព័ន្ធផ្សព្វផ្សាយក្នុងស្រុកបានរាយការណ៍ថា អ្នកតវ៉ារាប់សិបនាក់ ដែល​កាន់​រូបតុក្កតា​ខ្លាឃ្មុំ​បាន​ប្រមូល​​ផ្តុំគ្នានៅ​ទីក្រុងមីឡាន កាលពីថ្ងៃសៅរ៍ (២២ មេសា) ដើម្បីទាមទារ "ការលើកលែង​ទោស"​ ដល់សត្វខ្លាឃ្មុំញី​ដែល​បាន​សម្លាប់​អ្នក​រត់​ប្រណាំង​អាយុ​២៦​ឆ្នាំ​ម្នាក់​នៅ​ភ្នំអាល់​ប្រទេស​អ៊ីតាលី។

ក្រុមការពារសិទ្ធិសត្វ បានប្រមូលផ្តុំគ្នានៅ Piazza Cordusio ដើម្បីគាំទ្រសត្វខ្លាឃ្មុំដែលខេត្ត Trento និយាយថាខ្លួនចាប់សត្វនេះ កាលពីយប់ថ្ងៃអង្គារ (១៨ មេសា)។

ការស្វែង​រកសត្វខ្លាឃ្មុំមួយក្បាលនេះ បានចាប់ផ្តើមឡើង បន្ទាប់ពីសាកសពរបស់លោក Andrea Papi ត្រូវបានរកឃើញនៅថ្ងៃទី ៦ ខែមេសា ក្នុងព្រៃនៃតំបន់ភ្នំ Peller ជាទីដែលជនរងគ្រោះ បាន​ទៅ​រត់​ហាត់​ប្រាណ។

ការស្លាប់​របស់លោក Papi បានបើកការជជែកដេញដោលឡើងវិញលើជម្លោះមនុស្សនិងសត្វព្រៃ នៅក្នុង​តំបន់ដែលចំនួនខ្លាឃ្មុំមានការកើនជាថ្មីតាំងពីឆ្នាំ ១៩៩៩ ក្រោមកម្ម​វិធី​ផ្តល់​មូល​និធិ​សហភាព​អឺរ៉ុប​៕ អត្ថបទ៖ វ៉ាន់ ស្រីទាវ