នាយករដ្ឋមន្ត្រីអូស្ត្រាលីលោក Anthony Albanese បានធ្វើពិធីគោរពវិញ្ញាណក្ខន្ធលោក Barry Humphries នៅថ្ងៃអាទិត្យ (២៣ មេសា)នេះ ដែលជាតារាកំប្លែងកើតនៅទីក្រុង Melbourne ហើយត្រូវបានគេស្គាល់ថាជាតួអង្គក្នុងភាពយន្ត Dame Edna Everage ដោយ​ពិពណ៌នា​រូប​លោក​ថាជា "មនុស្សដែលប្រជាជនអូស្ត្រាលីស្រលាញ់បំផុត" និងជា "អ្នក​កំប្លែង​មាន​ទេព​កោសល្យ​" ដែលបានរួមចំណែកយ៉ាងធំធេងដល់ប្រទេស។

សារព័ត៌មាន The Sydney Morning Herald បាននិយាយថាលោក Humphries មានអាយុ ៨៩ឆ្នាំ បានទទួលមរណភាពកាលពីថ្ងៃសៅរ៍ (២២ មេសា) នៅមន្ទីរពេទ្យ St Vincent's ក្នុង​ទីក្រុងស៊ីដនី ជាទីដែលរូបលោក ព្យាបាលបញ្ហាសុខភាពផ្សេងៗ។

លោក Humphries ទទួលបានភាពល្បីល្បាញក្នុងចក្រភពអង់គ្លេសក្នុងទសវត្សរ៍ឆ្នាំ ១៩៧០ ដោយ​ដើរ​តួជាតួអង្គសម្តែងត្រាប់ជនជាតិអូស្ត្រាលីជាច្រើន រួមមានតួអង្គ Dame Edna អ្នក​ការ​ទូត​ស្រវឹង​ស្រា Les Patterson និងតាចាស់ផ្សងព្រេង Sandy Stone ជាដើម៕ អត្ថបទ៖ វ៉ាន់ ស្រីទាវ