កណ្ដាល៖ លោកយាយឈ្មោះ ហ៊ាន សឿង (ហៅ តក់) អាយុ៧០ឆ្នាំ រស់នៅភូមិចុងកោះថ្មី ឃុំកោះធំ“ក” ស្រុកកោះធំ លោកយាយទទួលបានប័ណ្ណសមធម៌ (ក្រ១) ចាប់តាំងពីឆ្នាំ២០០០ មកដល់បច្ចុប្បន្ន ដោយទទួលបានប្រាក់ឧបត្ថម្ភ ២២,៤០០០ រៀល ក្នុងមួយខែ និងទទួលការទំនុកបំរុងជាប្រចាំពីសាខាកាកបាទក្រហមខេត្ត ក្រុមការងាររាជរដ្ឋាភិបាលចុះមូលដ្ឋានឃុំ ស្រុក និងរដ្ឋបាលស្រុកកោះធំ ។

ការប្រគល់អំណោយជាថវិកា និងសម្ភារៈប្រើប្រាស់មួយចំនួនតាមរយៈតំណាងរបស់ ឯកឧត្តម គង់ សោភ័ណ្ឌ ប្រធានសាខាកាកបាទក្រហមកម្ពុជាខេត្តកណ្តាលផងដែរនោះ។ ឯកឧត្តមបានបញ្ជាក់ប្រាប់តាមប្រព័ន្ធទំនាក់ទំនងថា ក្រោមការដឹកនាំប្រកបដោយគតិបណ្ឌិតរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា តែងតែយកចិត្តទុកដាក់អំពីសុខទុក្ខ ដោះស្រាយការលំបាករបស់ប្រជាពលរដ្ឋ និងមិនទុកឱ្យប្រជាពលរដ្ឋណាម្នាក់រងគ្រោះលំបាកដោយមិនបានជួយសង្គ្រោះឡើយ។ ជាក់ស្តែង លោកយាយឈ្មោះ ហ៊ាន សឿង (ហៅ តក់) អាយុ៧០ឆ្នាំ រស់នៅភូមិសាស្ត្រខាងលើ មានជីវភាពល្អប្រសើរ ពោលគឺលោកយាយ មានផ្ទះរស់នៅសមរម្យ មានស្បៀងអាហារគ្រប់គ្រាន់ ប៉ុន្តែជាទម្លាប់ឧស្សាហ៍របស់លោកយាយ និងប្តី ដែលតែងតែរករបរចិញ្ចឹមជីវិតតិចតួចកំដរជីវភាពប្រចាំថ្ងៃតាមទម្លាប់អ្នកជនបទស្រែចំការតែប៉ុណ្ណោះ ។

ឯកឧត្តម គង់ សោភ័ណ្ឌ ថ្លែងបន្តថា នៅថ្ងៃទី២៣ ខែមេសា ឆ្នាំ២០២៣ នេះ សាខាកាកបាទក្រហមខេត្តកណ្តាល និងរដ្ឋបាលស្រុកកោះធំ ថែមទាំងបាននាំយកស្បៀងអាហារ សម្ភារៈ និងថវិកា ដ៏ថ្លៃថ្លារបស់សម្តេចតេជោនាយករដ្ឋមន្រ្តី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនគ្រួសារលោកយាយតក់ ដែលសរុបជាថវិកា ១លាន៦០ម៉ឺនរៀលថែមទៀតផង ។

ជាការឆ្លើយតបរបស់លោកយាយ លោកយាយបានលើកម្រាមដៃ១០អរគុណជាអនេកកប្បការដល់សម្ដេចតេជោហ៊ុន សែន និងសម្ដេចកិត្តិព្រឹទ្ធប៊ុន រ៉ានី ហ៊ុន សែន ដែលបានយកចិត្តទុកដាក់ជួយឧបត្ថម្ភជាប្រចាំខែមិនដែលលួសខែឡើយ ហើយជំនួយឧបត្ថម្ភនេះ បានជួយចិញ្ចឹមជីវិតរបស់លោកយាយ និងស្វាមីរស់នៅយ៉ាងងាយស្រួល គ្មានទុក្ខលំបាកបន្តិចសោះឡើយ៕