កាលព្រឹកថ្ងៃទី ២៣ ខែ មេសា ឆ្នាំ២០២៣ លោកជំទាវ ម៉ែន នារីសោភ័គ អនុប្រធាន​ក្រុម​ការងារ​គណបក្ស​ប្រជាជន​កម្ពុជា ចុះជួយឃុំពាមរាំង ស្រុកលើកដែកខេត្តកណ្តាល និងជាប្រធាន​ក្រុម​ការ​ងារ​​គណបក្ស​​ចុះមូលដ្ឋាន ភូមិពាមរាំងក្រោម បានដឹកនាំក្រុមគ្រូពេទ្យស្ម័គ្រចិត្ត និងសមាជិក-សមាជិកា ចុះជួយមូលដ្ឋានឃុំពាមរាំង បានអញ្ជើញជួបសំណេះសំណាល អប់រំផ្សព្វផ្សាយពីការ ថែ​ទាំ​សុខភាព ពិនិត្យ និងផ្តល់ថ្នាំព្យាបាល ជូនលោកយាយលោកតា បងប្អូនប្រជាពលរដ្ឋ និង​យុវជន​ប្រមាណ ១៤០​នាក់ រស់នៅឃុំពាមរាំង ស្រុកលើកដែក ខេត្តកណ្តាល។

នៅក្នុងឱកាសនោះលោកជំទាវ ម៉ែន នារីសោភ័គ បានឱ្យដឹងថា នេះជាលើកទី២ហើយ ដែល​បាន​ដឹកនាំក្រុមការងារប្រមាណជាង៣០នាក់ និងក្រុមគ្រូពេទ្យស្ម័គ្រចិត្តចម្រុះ ចំនួន១០នាក់ ចុះ​មក​ពិនិត្យសុខភាពទូទៅ និងផ្តល់ថ្នាំព្យាលបាល ជូនលោកយាយលោកតា បងប្អូនប្រជាពលរដ្ឋ ដែល​រស់នៅឃុំពាមរាំង ស្រុកលើកដែក ខេត្តកណ្តាលនេះ ដោយឥតគិតថ្លៃ។ ដោយការ​ចុះ​ពិនិត្យ​សុខភាពជូនប្រជាពលរដ្ឋលើកនេះ រួមមាន ជំងឺទូទៅ ជំងឺសន្លាក់ លើសឈាម និង​ឡើង​ជាតិស្ករ​។ លោកជំទាវ អនុប្រធានក្រុមការងារ បានអោយដឹងទៀតថា ឆ្លៀតក្នុងឱកាសនេះដែរ ក្រៅ​ពីការពិនិត្យសុខភាពទូទៅ ក្រុមការងារបានធ្វើការអប់រំផ្សព្វផ្សាយបង្កើនការយល់ដឹង ពីការ​ប្រែប្រួល​អាកាសធាតុ ខណៈដែលបច្ចុប្បន្ននៅកម្ពុជា មានអាកាសធាតុក្តៅណាស់ ។

លោកយាយលោកតា និងបងប្អូនប្រជាពលរដ្ឋទាំងអស់មានក្តីសប្បាយរីករាយ និង​ថ្លែង​អំណរ​គុណ ចំពោះ​ក្រុមការងារទាំងអស់ ដែលបានរៀបចំការពិនិត្យសុខភាព ពិគ្រោះយោបល់ និង​ផ្តល់​ថ្នាំ​ព្យាបាលជំងឺ​ដោយឥតគិតថ្លៃ ជូនដល់ពួកគាត់ ស្ទើរតែដល់ខ្នងផ្ទះ ។

សូមបញ្ជាក់ថា ថ្ងៃនេះគឺជាលើកទី២ហើយ ដែលក្រុម​ការងារ​គណបក្ស​ចុះមូលដ្ឋាន​ភូមិ​ពាមរាំង​ក្រោម ឃុំពាមរាំង រួមជាមួយក្រុមគ្រូពេទ្យស្ម័គ្រចិត្ត បានចុះអប់រំសុខភាព និង​ពិនិត្យ​សុខភាព​ជូន​បងប្អូន​ប្រជាពលរដ្ឋនៅទីនេះ។ ក្រុមការងារនឹងបន្តចុះធ្វើសកម្មភាពនេះ ជាបន្តបន្ទាប់ទៀត ដែល​អាជ្ញា​មូលដ្ឋាននឹងជូនដំណឹងដល់ប្រជាពលរដ្ឋ អំពីកាលបរិច្ឆេទនៃការចុះ​ព្យាបាល​នា​ពេល​ខាង​មុខ​៕ អត្ថបទ៖ សំ ងីម