កងកម្លាំងប្រដាប់អាវុធរបស់សហរដ្ឋអាមេរិក និងចក្រភពអង់គ្លេស បានជម្លៀសបុគ្គលិកស្ថាន​ទូតចេញ​ពីប្រទេសស៊ូដង់ ខណៈប្រទេសផ្សេងទៀត​បាន​ប្រញាប់ប្រញាល់​នាំយកពលរដ្ឋរបស់ពួកគេទៅកាន់ទីសុវត្ថិភាព ក្នុងពេលក្រុមយោធាជាគូប្រជែង​បានប្រយុទ្ធគ្នានៅរដ្ឋធានី Khartoum កាលពីថ្ងៃអាទិត្យ។

ការផ្ទុះឡើងការប្រយុទ្ធគ្នាកាលពី៨ថ្ងៃកន្លងទៅនេះរវាងកងទ័ព និងក្រុមទាហានប៉ារ៉ាកងកម្លាំង​គាំទ្ររហ័ស (RSF) បានបង្កឱ្យមានវិបត្តិមនុស្សធម៌ បណ្តាលឲ្យមនុស្ស ៤២០នាក់ស្លាប់ និងពលរដ្ឋស៊ូដង់រាប់លាននាក់បានជាប់គាំង ដោយគ្មានលទ្ធភាពទទួលបានសេវាជាមូលដ្ឋាន។ ខណៈមនុស្សជាច្រើនព្យាយាមរត់គេចភៀសខ្លួនពីភាពវឹកវរ ប្រទេសនានាបានចាប់ផ្តើមចុះចតយន្តហោះ និងរៀបចំក្បួនរថយន្តដឹកជញ្ជូននៅក្នុងរដ្ឋធានី Khartoum ដើម្បីជម្លៀសពលរដ្ឋរបស់ពួកគេ។ ពលរដ្ឋជាជនបរទេសមួយចំនួនបានរងរបួស។ ភាគីជម្លោះ បានចោទប្រកាន់គ្នាទៅវិញទៅមកពីការវាយប្រហារលើក្បួនរថយន្តបារាំង ដែលភាគីទាំងពីរ និយាយថាជនជាតិបារាំងម្នាក់បានរបួស។

ក្រសួងការបរទេសបារាំង កាលពីពេលមុនបាននិយាយ ខ្លួនកំពុងជម្លៀសបុគ្គលិកការទូត និងពលរដ្ឋ ប៉ុន្តែពុំបានធ្វើការអត្ថាធិប្បាយនោះទេ។

ប្រធានាធិបតី លោក Joe Biden បាននិយាយថា សហរដ្ឋអាមេរិកកំពុងផ្អាកប្រតិបត្តិការជាបណ្តោះអាសន្ននៅស្ថានទូតរបស់ខ្លួនក្នុងទីក្រុង Khartoum ប៉ុន្តែនៅតែប្តេជ្ញាចិត្តចំពោះប្រជាជនស៊ូដង់ ដោយលោកបាននិយាយជាថ្មីនូវការអំពាវនាវឱ្យមានបទឈប់បាញ់។ អំពើហឹង្សាដ៏ឃោរឃៅ​នៅក្នុងប្រទេសស៊ូដង់ បានបណ្តាលឲ្យបាត់បង់ជនស៊ីវិលស្លូតត្រង់​រាប់រយនាក់រួចទៅហើយ។ យើងកំពុងផ្អាកប្រតិបត្តិការជាបណ្តោះអាសន្ននៅស្ថានទូតអាមេរិកប្រចាំប្រទេសស៊ូដង់ ប៉ុន្តែការប្តេជ្ញាចិត្តរបស់យើងចំពោះប្រជាជនស៊ូដង់ និងអនាគតដែលពួកគេចង់បានគឺនៅតែបន្ត។ ប្រទេសបារាំងបាននិយាយថា យន្តហោះបារាំងមួយគ្រឿងដែលផ្ទុកមនុស្សប្រមាណមួយរយនាក់ រួមទាំងគណៈប្រតិភូសហភាពអឺរ៉ុបនៅទីក្រុង Khartoum រួមជាមួយនឹងជាតិសាសន៍ផ្សេងទៀត​បានចាកចេញទៅកាន់ប្រទេសជីប៊ូទី(Djibouti) ហើយយន្តហោះទីពីរដែលមានចំនួនអ្នកដំណើរ​ស្រដៀងគ្នានឹងហោះចេញក្នុងពេលឆាប់ៗនេះ។