ភ្នំពេញ៖ ចាប់ពីម៉ោង ១២ថ្ងៃត្រង់ នៅថ្ងៃទី24 ខែមេសានេះទៅ សំបុត្រចូលទស្សនាប្រកួតកីឡា SEA GMAES ត្រូវបានចាប់ផ្តើមមានចែកជូនភ្ញៀវជាតិអន្តរជាតិចូលទស្សនាប្រកួតSEA GAMESលើកទី៣២ និងASEAN PARA GAMESលើកទី១២ នៅតាមទីតាំងចំនួន៦ នៅក្នុងរាជធានី​ភ្នំពេញ ខណៈវិញ្ញាសាប្រកួតដំបូងគឺក្រុមបាល់ទាត់បុរសឥណ្ឌូនេស៊ី​ជួបជាមួយហ្វីលីពីន ហើយ​ក្រុមកម្ពុជា ជួបជាមួយក្រុមទីម័រខាងកើតនៅថ្ងៃទី២៩ មេសា ឆ្នាំ២០២៣។

មន្ត្រីចែកសំបុត្រទស្សនាSEA GAMES នៅពហុកីឡាដ្ឋានជាតិអូឡាំពិក ថ្លែងថា ទីតាំងស្តង់ចែក​សំបុត្រ​ទស្សនាឥតគិតថ្លៃទាំង៦កន្លែង នោះរួមមាន៖ ពហុកីឡាដ្ឋានជាតិអូឡាំពិក ពហុកីឡាដ្ឋានមរតកតេជោ ផ្សារទំនើបអ៊ីអនទាំងបីសាខា និង ផ្សារទំនើបអេដេននៅតំបន់បឹងកក់ ហើយភ្ញៀវជាតិអន្តរជាតិ ដែលមកយកសំបុត្រ គឺត្រូវចុះឈ្មោះ APP និងPlaystore Sea Games 2023។

បើតាមអ្នកគាំទ្រកីឡាបាល់ទាត់ SEA GAMES ថ្លែងថា បន្ទាប់ពីឃើញប្រព័ន្ធផ្សព្វផ្សាយនានា នៅថ្ងៃទី២៤ ខែមេសានេះចាប់ផ្តើមមានការចែកសំបុត្រឥតគិតថ្លៃចូលទស្សនាប្រកួតកីឡា SEA GAMES គឺពួកគេនាំគ្នាប្រញាប់មកសាកសួរព័ត៌មានដើម្បីទទួលបានសំបុត្រចូលទស្សនា និងធានាថា ខ្លួនពិតជាបានចូលទស្សនា។

បើតាមឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាSEA GAMES និង ASEAN PARA GAMES ថ្លែងថា គ្រប់ភ្ញៀវជាតិអន្តរជាតិចូលទស្សនាប្រកួតកីឡាSEA GAMES គឺត្រូវតែមានសំបុត្រទស្សនាមិនបង់ថ្លៃ ហើយសំបុត្រនោះ ត្រូវចុះឈ្មោះតាមអនឡាញ រួចហើយភ្ញៀវ​អាច​ទៅយកសំបុត្រនោះ នៅតាមទីលានប្រកួត និងតាមបណ្តាផ្សារទំនើប​អ៊ីអនទាំងបីសាខា ជាដើម។

សូមបញ្ជាក់ថា ប្រកួតកីឡាSEA GAMESលើកទី៣២ មានកីឡាប្រកួតចំនួន៣៧ប្រភេទកីឡា និងមានវិញ្ញាសាប្រកួតចំនួន៥៨១វិញ្ញាសា ។ ដោយឡែកការប្រកួតកីឡា ASEAN PARA GAMESលើកទី១២ មានកីឡាប្រកួតចំនួន១៣ប្រភេទកីឡា និងមានវិញ្ញាសាប្រកួតចំនួន​៤៣១វិញ្ញាសា មកពីបណ្តាប្រទេសចំនួន១១ នៅក្នុងតំបន់អាស៊ីអាគ្នេយ៍ ហើយការប្រកួតវិញ្ញាសាដំបូងគេ គឺវិញ្ញាសា បាល់ទាត់បុរស ដែលនឹងចាប់ផ្តើមនៅថ្ងៃទី២៩ ខែមេសានេះ៕ អត្ថបទ ស៊ុមសុខជា