ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បានថ្លែងរំលឹកថា សាសនាទាំងអស់នៅក្នុងប្រទេសកម្ពុជា មានកំណើតក្នុងថ្ងៃតែមួយ បើនិយាយពីក្រោយថ្ងៃរំដោះ ៧ មករា ១៩៧៩ ។ នេះជារឿងពិតនៅក្នុងប្រវត្តិសាស្ត្រនៃប្រទេសកម្ពុជា ។

សម្ដេចតេជោ ហ៊ុន សែន ខណៈបានអញ្ជើញជាអធិបតីក្នុងពិធីកាត់ឫសសីមា និងឆ្លងសមិទ្ធផល នានា នៅក្នុងវត្តព្រះបារមីវង្កតបុរី ហៅវត្តទួលក្រសាំង នៅក្នុងរាជធានីភ្នំពេញ បានរំលឹកពីការ​បំផ្លិចបំផ្លាញ គ្រប់វិស័យដល់ឫសគល់ ​រាប់ទាំងវិស័យសាសនាផងដែរ នៅក្នុងរបបប្រល័យ​ពូជសាសន៍​ខ្មែរក្រហម ប៉ុន្តែទោះជាយ៉ាងណាគេមិនអាចលុបបំបាត់នូវជំនឿក្នុងចិត្ត នៃសាសនា ដែលគេគោរពបានឡើយ ។

សម្តេចតេជោ ក៏បានរំលឹកអំពីប្រវត្តរបស់វត្តវង្គតបុរី ដែលពីមុនគ្រាន់តែជាកន្លែង​ភៀសសឹក នា សម័យសង្គ្រាម ចន្លោះឆ្នាំ១៩៧០ ដល់១៩៧៥ និងបានរំលឹកពីការកកើតរីកចម្រើនឡើងវិញ នៃទីអារាមនេះ ជាពិសេសប្រវត្តិទាក់ទងយ៉ាងជ្រាលជ្រៅជាមួយនឹងលោកឪពុក អ្នកម្តាយ អ្នកមាន​គុណទាំងទ្វេរបស់សម្តេច ​និងក្រុមគ្រួសាររបស់សម្តេច​ ដែលបានចូលរួមកសាង​នូវទីអារាម​មួយនេះ ឱ្យមានការរីកចម្រើន ​ហើយសម្តេចក៏បានផ្តាំផ្ញើដល់ក្រុមគ្រួសារ​ កូនចៅរបស់សម្ដេច កុំបោះ​បង់ចោល ក៏ដូចជាការពារទីអារាមនេះ និងគប្បីបន្តឧស្សាហ៍មកធ្វើបុណ្យទាននៅទីអារាមនេះ ៕អត្ថបទ៖ មុត សុទ្ធ