វានឹងមិនមែនជាយុទ្ធនាការដំបូងទេនៅពេលនេះ ខណៈលោកប្រធានាធិបតីសហរដ្ឋអាមេរិក Joe Biden បង្កើនសកម្មភាពតតាំង ដើម្បីឈរឈ្មោះបោះឆ្នោតជាថ្មី ភាពជាក់ស្ដែងនៃការប្រកួត​ប្រជែង​ឆ្នាំ២០២៤ និងភាពខុសប្លែកគ្នាជាមួយឆ្នាំ២០២០ អំឡុងមានការឆ្លងរាលដាលខ្លាំងនៃវីរុស​រាតត្បាត​សកលកូរ៉ូណា បង្កើតឲ្យមានការប្រឈមថ្មីជាច្រើនសម្រាប់រូបលោក។

លោក Biden អ្នកប្រជាធិបតេយ្យ និយាយថា លោកនឹងឈរឈ្មោះជាថ្មី និងកំពុងពិចារណាការ​ប្រកាស​ជាផ្លូវការតាមរយៈវីដេអូ នៅថ្ងៃអង្គារសប្ដាហ៍នេះ ។

កាលពីឆ្នាំ២០២០ លោក Biden នៅតែមានប្រជាប្រិយភាពទាប ខណៈការឆ្លងរាតត្បាតវីរុស COVID-19 ដែលបានប៉ះពាល់ដល់ក្ដីរំពឹងភាគច្រើនរបស់ជីវិតពលរដ្ឋអាមេរិក រួមទាំងយុទ្ធនាការបោះឆ្នោត ដែល​បាននាំឲ្យលោកប្រកួតប្រជែងជាមួយលោកប្រធានាធិបតី Donald Trump មកពី គណបក្សសាធារណរដ្ឋ។

លោក Trump នៅតែថ្លែងទៅកាន់ការប្រមូលផ្ដុំធំៗ ប៉ុន្តែលោក Bidenវិញ ភាគច្រើនបានធ្វើ​យុទ្ធនាការ​របស់លោកតែតាមរយៈវីដេអូប៉ុណ្ណោះ ​ចេញពីជាន់ផ្ទាល់ដីនៃគេហដ្ឋានរបស់លោក នៅក្នុងទីក្រុង Wilmington រដ្ឋ Delaware ​ដើម្បីគេចចេញពីហ្វូងមនុស្ស ទប់ស្កាត់ការឆ្លងរាលដាល​ជំងឺ និងកាត់បន្ថយការប្រឈមឆ្លងវីរុសលើរូបលោក។

សន្និបាតរបស់គណបក្សប្រជាធិបេត្យនៅក្នុងទីក្រុងជីកាហ្គោ ​នឹងធ្វើដោយផ្ទាល់ជាជាងតាម online ។ ហើយលោក Biden ដែលមានវ័យ៨០ឆ្នាំ​ ជាប្រធានាធិបតីចាស់ជាងគេបំផុតនៅក្នុង​ប្រវត្តិសាស្ត្រអាមេរិក ​នឹងត្រូវចេញធ្វើការដោយផ្ទាល់ ខណៈលោកព្យាយាមដណ្ដើមតំណែង​រយៈពេល៤ឆ្នាំបន្ថែមទៀត៕