​គ្រួសារ​ជន​ប៉ា​ឡេ​ស្ទី​ន​ម្នាក់​ ដែល​ត្រូវបាន​គេ​បាញ់សម្លាប់​អំឡុង​កុបកម្ម​ដោយ​ក្រុម​តាំង​លំនៅ​និគមន៍​នៅក្នុង​តំបន់​កាន់កាប់​វ៉េ​ស​ប៊ែ​ង និយាយថា ពួកគេ​មិនអាច​រាយការណ៍​ករណី​ស្លាប់​របស់គាត់​ដល់​ក្រុមនគរបាល​បាន​នោះទេ ហើយ​ពួកគេ​ពឹង​ផ្អែកលើ​សេចក្តីរាយការណ៍​សារព័ត៌មាន​អ៊ីស្រាអែល​មួយគត់ ដើម្បី​ឈានទៅរក​ការស៊ើបអង្កេត។

​លោក Sameh al-Aqtash ត្រូវបាន​គេ​បាញ់សម្លាប់​នៅក្រៅ​លំនៅស្ថាន​របស់លោក​ស្ថិត​ក្នុងភូមិ Hawara កាលពី​ខែកុម្ភៈ​កន្លងទៅ ក្រោយពេល​ក្រុម​តាំង​លំនៅ​និគម​ន៍ និង​ទាហាន​ជួបជុំគ្នា​នៅក្បែរ​របង​បរិវេណ​ភូមិ​ប៉ា​ឡេ​ស្ទី​ន​ជិតគ្នា Zaatara។

​បងប្រុស​របស់គាត់ គឺ​លោក Rashdan និយាយថា គ្រួសារ​របស់លោក​បាន​ព្យាយាម ២​លើក ដើម្បី​រាយការណ៍​ករណី​ស្លាប់​របស់គាត់​ដល់​ក្រុម​អាជ្ញាធរ​អ៊ីស្រាអែល​នៅ​រយៈពេល​ប៉ុន្មាន​ថ្ងៃក្រោយ​ការបាញ់សម្លាប់ ប៉ុន្តែ​ត្រូវបាន​គេ​បដិសេធន៍​មិន​ព្រម​ទទួល។

​ក្រុមនគរបាល​អ៊ីស្រាអែល បាន​បើក​ការស៊ើបអង្កេត ក្រោយ​សេចក្តីរាយការណ៍​សារព័ត៌មាន លើកឡើង​ពី​ផលវិបាក​របស់​គ្រួសារ​ក្នុងការ​រាយការណ៍​ករណី​ស្លាប់​មួយ​នេះ ។

​លោក Rashdan al-Aqtash និយាយថា អ្នកភូមិ Zaatara ដែល​សុទ្ធតែជា​សាច់ញាតិ​គ្រួសារ al-Aqtash គ្មាន​អាវុធ​នោះទេ ពេល​តតាំង​ជាមួយ​ក្រុម​តាំង​លំនៅ​និគម​ន៍​កាលពី​ថ្ងៃទី ២៦ ខែកុម្ភៈ។

​លោក​និយាយថា ពួកគេ​ចាប់ផ្តើម​ចោល​ដុំថ្ម ហើយ​ពួកយើង​ក៏បាន​ចោល​ដុំ​គ្រួស​ទៅលើ​ពួកគេ​វិញ និង​នាំគ្នា​ស្រែកថា “​ព្រះ​អា​ឡា​ដ៏​អស្ចារ្យ​” ។

​លោក​បន្តថា នៅក្នុង​ស្ថានភាព​បែបនេះ ជាធម្មតា​កងទ័ព​បាញ់​ឧស្ម័ន​បង្ហូរទឹកភ្នែក ដើម្បី​បំបែក​ហ្វូងមនុស្ស និង​បន្ទាប់មក​បាញ់​គ្រាប់កាំភ្លើង​ជ័រ ហើយ​ចុងក្រោយ​ពួកគេ​បាញ់​ឡើងលើ ប៉ុន្តែ​លើក​នេះ ពួកគេ​ចាប់ផ្តើម​បាញ់​គ្រាប់​ពិត​តម្រង់​ទៅលើ​ហ្វូងមនុស្ស​តែម្តង។

​លោក​ថា យើង​ត្រូវការ​ចំណាយពេល ៤០​នាទី ​ដើម្បី​នាំ​លោក Sameh ទៅកាន់​មន្ទីរពេទ្យ ដោយសារ​តែមាន​ការបិទ​ផ្លូវ ហើយ​គ្រូពេទ្យ​ប្រកាសថា​គាត់​បាន​ស្លាប់​ពេលទៅដល់៕​