​អ្នក​អាជីព និង​សហការី ២​រូប ដែល​នៅ​បម្រើការ​ក្នុង​ហាង​លក់​សម្លៀកបំពាក់ បាន​មមាញឹក​ខ្លាំង​នាពេល​រសៀល​នៅ​ទីលាន​បាញ់កាំភ្លើង South Shore Shooting Range។

​ស្នូរ​គ្រាប់កាំភ្លើង​ដ៏​សន្ធាប់ អាច​ឮ​បាន​នៅក្រៅ​ចំណតរថយន្ត​កាលពី​ថ្ងៃ​ព្រហស្បតិ៍ នៅតាម​ផ្លូវ​ស្ងាត់​អមដោយ​ដើមឈើ​ធំៗ និង​លំនៅស្ថាន​មាន​អាង​ហែល​ទឹក​នៅ​សួនច្បារ​ខាងក្រោយ ស្ថិតក្នុង​តំបន់​ជាយក្រុង Islip សហរដ្ឋអាមេរិក។

​នាង Jenn និង​នាង Shelby គឺជា​មិត្ត​ភ័ក្តិ​នឹង​គ្នា​ដែល​មិន​ចង់​ប្រើ​នាមត្រកូល​របស់​ពួកគេ បាន​ឈរលើ​ច្រក​បាញ់កាំភ្លើង​ក្នុង​អគារ ពាក់​កាស​ទប់​សំឡេង​រំខាន និង​វ៉ែនតា​ការពារ ពេលដែល​ពួកគេ​តម្រង់​ចុង​កាណុង​កាំភ្លើង​វែង និង​កាំភ្លើងខ្លី​ឲ្យ​ចំ​គោលដៅ​ដែល​តំណាង​ឲ្យ​ខ្លួន​មនុស្ស។

​នាង Jenn ដែលមាន​ការអនុញ្ញាត​ឲ្យ​ប្រើប្រាស់​អាវុធ ហើយ​នៅ​មិនទាន់​សម្រេចចិត្តថា​តើ​កាំភ្លើងខ្លី​ដំបូង​របស់​នាង​ជា​ប្រភេទ​អ្វី​នោះ និយាយថា ខ្ញុំ​មិនមែនជា​អ្នកថ្មី​ថ្មោង​នោះទេ ។ គ្រាន់តែ​ចាប់ផ្តើម និង​រក​ទិញ​អាវុធ។

​នាង​បន្តថា ខ្ញុំ​ព្យាយាម​ហាត់​បាញ់កាំភ្លើង​នៅ​ទីលាន​បាញ់ ។ ខ្ញុំ​មិន​និយាយថា ខ្ញុំ​ជា​អ្នក​ចូលចិត្ត​នោះទេ ប៉ុន្តែ​គ្រាន់តែ​ព្យាយាម​រៀន​បាញ់កាំភ្លើង។ នាង Jenn និង​នាង Shelby ស្ថិតក្នុង​ចំណោម​ចំនួន​ពលរដ្ឋ​អាមេរិក​កើនឡើង ពិសេស​ស្ត្រី និង​ជនជាតិ​ស្បែក​ខ្មៅ សម្រុក​ទៅ​ហាង​លក់​អាវុធ ដែល​ភាគច្រើន​នៃ​ពួកគេ គឺជា​អ្នក​ដំបូង​ដែល​ពុំ​ធ្លាប់​ទិញ​អាវុធ​កាលពីមុន។

​ការចាប់អារម្មណ៍​ខ្ពស់​លើ​អាវុធ បាន​កើតមានឡើង ស្របពេល​មាន​ករណី​បាញ់ប្រហារ​ទ្រង់ទ្រាយ​ធំ​ដ៏​គួរ​រន្ធត់​នៅ​ទូទាំង​សហរដ្ឋអាមេរិក ។ កាលពី​រយៈពេល ២​សប្តាហ៍​មុន មនុស្ស ៤​នាក់ បាន​រង​ការបាញ់ប្រហារ ករណី​បាញ់សម្លាប់​មួយ​កើត​មាននៅ​ទីក្រុង Kansas រដ្ឋ New York និង​ករណី​មួយទៀត កើតឡើង​នៅ​រដ្ឋ Texas ដោយ​គ្រាន់តែ​ពួកគេ ច្រឡំ​ដោយ​អ​ចេតនា​ចូល​ផ្ទះ​ខុស ឬ​បើកទ្វារ​ខុស ប៉ុណ្ណោះ ៕​