ភ្នំពេញ៖ ក្នុងត្រីំមាសទី១ ឆ្នាំ២០២៣, អគ្គនាយកដ្ឋានពន្ធដារ ប្រមូលអាករលើតម្លៃបន្ថែម ចំពោះប្រតិបត្តិការពាណិជ្ជកម្មតាមប្រព័ន្ធអេឡិច ត្រូនិក (E-Commerce) បានចំនួនជាង ៨៤ ប៊ីលានរៀល ត្រូវប្រមាណជិត ២១ លានដុល្លារអាមេរិក។

អគ្គនាយកដ្ឋានពន្ធដារ ចេញផ្សាយព្រឹត្តិបត្រព័ត៌មានប្រចាំសប្តាហ៍ នៅចុងសប្តាហ៍កន្លងមកនេះ ដោយបានបង្ហាញ ពីប្រតិបត្តិការ ប្រមូលចំណូលពាណិជ្ជកម្មតាមប្រព័ន្ធអេឡិចត្រូនិក (E-Commerce)។ ជុំវិញការប្រមូលចំណូលអាករលើតម្លៃបន្ថែមប្រភេទនេះ នៅ ក្នុងខែ មករា ឆ្នាំ ២០២៣, អគ្គនាយកដ្ឋានពន្ធដារ ប្រមូលអាករលើតម្លៃបន្ថែម ចំពោះប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក នេះ បានចំនួនប្រមាណជាង ២៤ ប៊ីលានរៀល ត្រូវជាង ៦ លានដុល្លារអាមេរិក តែបើគិតសរុបក្នុងរយៈពេល ៣ ខែ ដើមឆ្នាំ ២០២៣ នេះ វិញ អគ្គនាយកដ្ឋានប្រមូលបានប្រមាណ ៨៤,៦៧ប៊ីលានរៀល ត្រូវប្រមាណជា ២០,៩១លានដុល្លារអាមេរិក។

ជុំវិញការប្រមូលចំណូលនេះ បើគិតជាមធ្យមក្នុងឆ្នាំ ២០២៣ ចំណូល E-Commerce ប្រចាំខែ គឺមានប្រមាណជា ៧លានដុល្លារ នៅក្នុងខែ ប្រៀបធៀបនឹងឆ្នាំ ២០២២ គឺមានចំនួនក្នុងរង្វង់ ៥ លានដុល្លារ ក្នុងមួយខែ។ បើយោងតាមតួលេខចំណូលពន្ធពី E-Commerce នេះ កាលពីឆ្នាំ២០២២ គិតពីខែមេសា ដល់ខែធ្នូ អគ្គនាយកដ្ឋានប្រមូលបានជាង ១៧៨ប៊ីលានរៀល ត្រូវប្រមាណជិត ៤៤ លានដុល្លារប៉ុណ្ណោះ។

អនុលោមតាមច្បាប់ និងបទប្បញ្ញត្តិជាធរមាន អគ្គនាយកដ្ឋានពន្ធដារ បានអនុវត្ត និងគ្រប់គ្រងការ ប្រមូលអាករលើតម្លៃបន្ថែម ចំពោះប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក (E-Commerce) ចំពោះការផ្គត់ផ្គង់ទំនិញ ឬសេវាឌីជីថល តាមប្រព័ន្ធអេឡិច ត្រូនិក ឬរាល់សកម្មភាពពាណិជ្ជកម្មតាមប្រព័ន្ធអេឡិចត្រូនិក ដែលធ្វើឡើងដោយទាំងអ្នកជាប់ពន្ធអនិវាសនជន និងអ្នកជាប់ពន្ធនិវាសន ជន។

អ្នកជាប់ពន្ធអនិវាសនជនមានកាតព្វកិច្ចចុះបញ្ជីអាករលើតម្លៃបន្ថែមសាមញ្ញ បើគិតមកត្រឹមពេលនេះក្រុមហ៊ុនដែលធ្វើប្រតិបត្តិការ ពាណិជ្ជកម្មតាមប្រព័ន្ធអេឡិចត្រូនិក (E-Commerce) មានចំនួន ៦៨, បានចុះបញ្ជីអាករលើតម្លៃបន្ថែមសាមញ្ញរួមមាន META, GOOGLE, YOUTUBE, TIK TOK, NETFLIX 10។ ស្របពេលក្នុងបដិវត្តឧស្សាហកម្ម ៤.០ សេដ្ឋកិច្ចឌីជីថលកំពុងមានការរីក លូតលាស់ ឥតឈប់ឈរ ពីមួយឆ្នាំទៅមួយឆ្នាំ ក្នុងនោះ ការធ្វើពាណិជ្ជកម្មតាមប្រព័ន្ធអេឡិចត្រូនិក (E-Commerce) អគ្គនាយកដ្ឋានពន្ធដារ រំពឹងថា វិស័យនេះនឹងបន្តរីកចម្រើន ដែលនឹងជំរុញឱ្យចំណូលពន្ធពី E-Commerce នឹងរក្សានូវចីរភាពកំណើនពីមួយឆ្នាំទៅមួយឆ្នាំ។

សូមបញ្ជាក់ថា ជុំវិញការប្រមូលចំណូល នៅក្នុងត្រីមាសទី ១ឆ្នាំ២០២៣ នេះ អគ្គនាយកដ្ឋានពន្ធដារ ប្រមូលចំណូលប្រភេទពន្ធ-អាករ គ្រប់ប្រភេទ សរុបបានចំនួនជាង ៥ ៤៤២ ប៊ីលានរៀល ត្រូវប្រមាណជាង ១ ៣៤៣លានដុល្លារ ស្មើជាង ៣៧,៦៣ភាគរយ នៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣៕ អត្ថបទ៖ សុន រ៉ាឌី