ភ្នំពេញ៖សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានជំរុញឱ្យបណ្តាញចែកចាយប្រព័ន្ធ Internet នៅកម្ពុជាកាន់តែមានទំហំធំ និងស្ថិរភាព ព្រោះការងារមួយចំនួនទាំងកម្រិតរាជរដ្ឋាភិបាល វិស័យឯកជន និងសាធារណជនទូទៅសុទ្ធតែប្រើប្រាស់ប្រព័ន្ធ Internet សម្រាប់បំពេញកិច្ចការ និងទំនាក់ទំនងប្រចាំថ្ងៃ។

ក្នុងឱកាសអញ្ជើញជាអធិបតីភាពដ៏ខ្ពង់ខ្ពង់ក្នុងពិធីសំណេះសំណាលប្រគល់សញ្ញាបត្រជូនគរុសិស្ស គរុនិស្សិត និស្សិត និងបុគ្គលិកអប់រំជាង២ពាន់នាក់ ដែលបានបញ្ចប់ការសិក្សាដោយជោគជ័យ ពីវិទ្យាស្ថានជាតិអប់រំនៅវិទ្យាស្ថានជាតិអប់រំ នៅព្រឹកថ្ងៃទី២៥ ខែមេសា សម្តេចតេជោ ហ៊ុន សែន មានប្រសាសន៍ថា ការពង្រឹងសេវាទូរស័ព្ទ និង internet ទាំងនៅក្នុងទីក្រុង ហើយពង្រីកបន្ថែមនៅ​តាមបណ្តាខេត្តនានា គឺស្របពេលដែលកម្ពុជា ទទួលធ្វើម្ចាស់ផ្ទះព្រឹត្តិការណ៍កីឡាស៊ីហ្គេម លើកទី៣២ ដែលមានប្រតិភូកីឡា និងភ្ញៀវទេសចរអន្តរជាតិចូលក្នុងប្រទេសច្រើន។

សម្តេចតេជោ ហ៊ុន សែន មានប្រសាសន៍៖ “យើងបាននិងកំពុងពង្រឹងនូវស្ថានភាព អ៊ិនធើណេតនៅក្នុងប្រទេសរបស់យើង ឱ្យមានល្បឿនកាន់តែលឿន ហើយមានស្ថិរភាព និងដាក់ពង្រាយចែកចាយទៅច្រើនតំបន់។ ឥឡូវនេះ ស៊ីហ្គេមជិតមកដល់ ក្រសួងប្រៃសណីយ៍ និងទូរគមនាគមន៍ នឹងពង្រីងសមត្ថភាព ប្រព័ន្ធអ៊ិនធើណេត នៅតំបន់ផ្សព្វផ្សាយ”។

កាលពីពេលថ្មីៗនេះសម្តេចតេជោ ក៏ធ្លាប់បាន ស្នើឱ្យគ្រប់បណ្ដាក្រុមហ៊ុនទូរស័ព្ទ អ៊ិនធើណេត ទាំងអស់ត្រូវពង្រឹងខ្លួន នៅទីក្រុងក៏ត្រូវពង្រឹង, ហើយពង្រីកវាទៅតាមតំបន់ទេសចរណ៍ ដើម្បីធ្វើការទាក់ទាញដល់អ្នកទេសចរណ៍ បានទៅលេងកម្សាន្ត នៅតំបន់ដាច់ស្រយាលឆ្ងាយៗ ចាំបាច់ណាស់ត្រូវមានប្រព័ន្ធ គាំទ្រខាងផ្នែកអ៊ីនធឺណិត។

យោងតាមស្ថិតិពីនិយ័តករទូរគមនាគមន៍កម្ពុជា ចំនួនអ្នកប្រើអ៊ីនធើណេតចល័ត និងអចល័ត មាន ១៧,២នាក់ គិតត្រឹមខែវិច្ឆិកា ឆ្នាំ២០២២ កើនឡើងទ្វេដង ធៀបនឹងឆ្នាំ២០១៦ ដែលមានអ្នកប្រើ​តែជាង ៨លាននាក់។ ចំណែក អ្នកប្រើទូរស័ព្ទចល័ត មានចំនួន ១៩,៤លាននាក់។

បច្ចុប្បន្ន ប្រតិបត្តិករផ្តល់សេវាទូរស័ព្ទ មានចំនួន ៥ មានដូចជា Cellcard, Smart, Viettel, Cootel និង SeaTel និងក្រុមហ៊ុនផ្តល់សេវាអ៊ិនធើណេតចំនួន ៣៨៕អត្ថបទ៖ វណ្ណៈ