ព្រះសីហនុ៖ នាវាវ៉េសស្ទើដាម នឹងមកចូលចតនៅកំពង់ផែស្វយ័តក្រុងព្រះសីហនុជាថ្មី នៅចុងឆ្នាំ២០២៣នេះ បន្ទាប់ពីចូលចតនៅថ្ងៃ១៤ ខែកុម្ភៈ ឆ្នាំ ២០២០។

នេះបើតាមការឱ្យដឹងពីឯកឧត្តម លូ គឹមឈុន អគ្គនាយកកំពង់ផែស្វយ័តក្រុងព្រះសីហនុ ថ្លែងប្រាប់ក្នុងអំឡុងដំណើរ​ទស្សនកិច្ចរបស់ក្លឹបអ្នកកាសែត​កម្ពុជា នៅខេត្តព្រះសីហនុ ចាប់ពីថ្ងៃទី២៥ ដល់២៧ ខែមេសា ឆ្នាំ២០២៣ ដែលមានការគាំទ្រពីក្រសួងទេសចរណ៍ និងរដ្ឋបាលខេត្តព្រះសីហនុ ។

ឯកឧត្តម លូ គឹមឈុន បានឱ្យដឹងបន្ថែមទៀតថា ស្តូបនាវាវ៉េសស្ទើដាម បាននិងកំពុងសាងសង់ នៅផែចាស់ ដើម្បីរំលឹកដល់ថ្ងៃដែលសម្តេចតេជោ ហ៊ុន សែន ប្រមុខរាជរដ្ឋាភិបាល បានអនុញ្ញាតឱ្យចូលចតនៅកំពង់ផែស្វយ័តក្រុងព្រះសីហនុ បន្ទាប់ពីប្រទេស និងដែនដីមួយចំនួនបានបដិសេធមិនអោយអនុញ្ញាតចូលចត។