អគ្គលេខាធិការអង្គការសហប្រជាជាតិលោក Antonio Guterres បាននិយាយកាលពីថ្ងៃចន្ទទី២៤មេសាថា ហានីភ័យនៃជម្លោះរវាងមហាអំណាចពិភពលោកគឺស្ថិតនៅចំណុចខ្ពស់ជាប្រវត្តិសាស្ត្រ ហើយរដ្ឋមន្ត្រីការបរទេសរុស្ស៊ី លោក Sergei Lavrov បានព្រមានថា ពិភពលោកស្ថិតនៅក្នុងកម្រិត​ដែលអាចមានគ្រោះថ្នាក់កាន់តែខ្លាំងជាងអំឡុងសង្រ្គាមត្រជាក់ទៅទៀត។

លោក Guterres ដែលបានអង្គុយក្បែរលោក Lavrov នៅក្នុងក្រុមប្រឹក្សាសន្តិសុខរបស់អង្គការ​សហប្រជាជាតិ​ បានរិះគន់ការវាយលុករបស់រុស្ស៊ី លើអ៊ុយក្រែន ថាជាដើមចម​នាំ​ឲ្យមានការ​រងទុក្ខខ្លាំង និងការបំផ្លិចបំផ្លាញនៅក្នុងប្រទេសនេះ និងប៉ះពាល់​ដល់សេដ្ឋកិច្ចសកល​ដែល​បានរងភាព​រង្គោះរង្គើ​ស្រាប់​ដោយសារការឆ្លងរាតត្បាតសកលនៃវីរុសកូរ៉ូណា។

លោក Guterres បានប្រាប់កិច្ចប្រជុំមានសមាជិក១៥ប្រទេស ស្ដីពីពហុភាគីនិយម និង​ការបង្កើត​ធម្មនុញ្ញ​អង្គការ​សហប្រជាជាតិថា ភាពតានតឹងរវាងមហាអំណាចធំៗ គឺកំពុងឈានដល់​កម្រិតខ្ពស់មិនធ្លាប់មានក្នុងប្រវត្តិសាស្រ្ត ។ ដូច្នេះ​ហានិភ័យ​នៃការផ្ទុះជម្លោះ នឹងកើតឡើង​តាមរយៈឧបទ្ទវហេតុ និងការគណនាខុស។

គួរឲ្យដឹងថា លោក Lavrov បានធ្វើជាប្រធាននៃកិច្ចប្រជុំក្រុមប្រឹក្សានេះដោយ​សាររុស្ស៊ី កាន់​តំណែង​ជាប្រធានប្ដូរវេនប្រចាំខែសម្រាប់ខែមេសានេះ៕