មីយ៉ាន់ម៉ា ៖ សារព័ត៌មានបានរាយការណ៍ថា អតីតអគ្គលេខាធិការអង្គការសហប្រជាជាតិលោក Ban Ki-moon បានជួបជាមួយមេដឹកនាំយោធាសហភាពមីយ៉ាន់ម៉ា អំឡុងដំណើរទស្សនកិច្ចរបស់លោកដែលមានគោល​ដៅ​លើក​កម្ពស់សន្តិភាព នៅក្នុងប្រទេស ដែលរងភាពរង្គោះរង្គើរដោយសារជម្លោះចាប់តាំងពីរដ្ឋប្រហារកាលពីរយៈពេល ២ឆ្នាំមុន ។ 

មីយ៉ាន់ម៉ា បានធ្លាក់ទៅក្នុងវិបត្តិ ចាប់តាំងពីយោធាទម្លាក់រដ្ឋាភិបាលឈ្នះឆ្នោតរបស់លោកស្រី Aung San Suu Kyi កាលពីខែកុម្ភៈឆ្នាំ ២០២១ ក្នុងនោះក្រុមឧត្តមសេនីយ៍ ប្រឹងព្យាយាមក្តោបអំណាច និងធ្វើសង្រ្គាមនៅតាម​សមរភូមិ​មុខជាច្រើនជាមួយក្រុមឧទ្ទាមជនជាតិភាគតិច ក៏ដូចជាបង្ក្រាបក្រុមចលនាតស៊ូគាំទ្រលទ្ធិប្រជាធិបតេយ្យ ។ 

យោងតាមសេចក្តីរាយការណ៍ពីសារព័ត៌មានរដ្ឋ បានឲ្យដឹងថា លោក Banបានបំពេញទស្សនកិច្ចដ៏គួរភ្ញាក់ផ្អើល​ទៅកាន់មីយ៉ាន់ម៉ា កាលពីថ្ងៃអាទិត្យ ។  

សារព័ត៌មានគាំទ្រយោធា NP News រាយការណ៍ថា លោក Banបានជួបជាមួយមេបញ្ជាការរបបសឹកមីយ៉ាន់ម៉ា លោក Min Aung Hlaing នៅក្នុងរដ្ឋធានីណៃពិដោ ។ 

លោក Zaw Min Tun គឺជាអ្នកនាំពាក្យរបបសឹកមីយ៉ាន់ម៉ា និយាយថា ពួកគេបានផ្លាស់ប្តូរទស្សនៈលើស្ថានភាព​ចុងក្រោយនៅមីយ៉ាន់ម៉ា និងពិភាក្សាដោយបើកចំហ និងវិជ្ជមាន ។ 

អតីតមន្រ្តីការទូតមួយរូបដែលធ្វើការឲ្យលោក Ban បាននិយាយថា ដំណើរទស្សនកិច្ចនេះ ត្រូវបានរៀបចំឡើងជា​យូរមកហើយ ហើយត្រូវបានពន្យារពេលជាច្រើនលើកច្រើនសារ ។ 

លោកនិយាយថា លោក Banនឹងអំពាវនាវឲ្យមានការដោះលែងលោកស្រី Suu Kyi ដែលត្រូវបានចាប់ខ្លួន អំឡុងពេលរដ្ឋប្រហារ ហើយនិងកំពុងជាប់ពន្ធនាគាររយៈពេល ៣៣ឆ្នាំ សម្រាប់ទោសទណ្ឌជាច្រើនរបស់លោកស្រី ហើយលោកបន្តថា ជំនួបជាមួយម្ចាស់ជ័យលាភីណូបែលសន្តិភាពម្នាក់នេះ មិនអាចទៅរួចបាននោះទេ ៕ ដោយ ៖ សារ៉ាត់