អាមេរិក ៖ កាលពីថ្ងៃចន្ទម្សិលមិញ សហរដ្ឋអាមេរិក បានប្រកាសដាក់ទណ្ឌកម្មលើមនុស្ស ៣នាក់ ដែលពួកគេ​និយាយ​ថា បានជាប់ពាក់ព័ន្ធនឹងការសម្អាត់ប្រាក់ ដែលត្រូវបានលួចដោយក្រុមលួចទិន្នន័យតាមប្រព័ន្ធអ៊ីនធឺណិត​របស់​កូរ៉េខាងជើង ដើម្បីជួយផ្គត់ផ្គង់ដល់កម្មវិធីអាវុធទីក្រុងព្យុងយ៉ាង ។ 

សេចក្តីថ្លែងការណ៍របស់រតនាគារសហរដ្ឋអាមេរិក និយាយថាមានពាណិជ្ជកររូបិយប័ណ្ណឌីជីថលមាន​មូលដ្ឋាន​នៅក្នុង​ប្រទេសចិន ពាណិជ្ជកររូបិប័ណ្ណឌីជីថលម្នាក់នៅទីក្រុងហុងកុង និងអ្នកតំណាងម្នាក់របស់ក្រុមហ៊ុនកូរ៉េខាងជើង Kwangson Banking Corp ដែលបច្ចុប្បបានផ្លាស់ទីលំនៅទៅកាន់ទីក្រុង Dandong ប្រទេសចិន ។ 

សេចក្តីថ្លែងបន្តទៀតថា លោក Wu Huihui គឺជាពាណិជ្ជករម្នាក់ដែលមានមូលដ្ឋាននៅប្រទេសចិន បានសម្រួលដល់​ការសម្អាតប្រាក់ដែលត្រូវបានលួចដោយក្រុមឧក្រិដ្ឋកម្មតាមអ៊ីនធឺណិត Lazarus Groupរបស់កូរ៉េខាងជើង ។ ចំណែកឯ លោក Cheng Hung Man គឺជាពាណិជ្ជករម្នាក់ដែលមានមូលដ្ឋាននៅទីក្រុងហុងកុង បានធ្វើការជាមួយលោក Wu ដើម្បីបង្វិលការទូទាត់ ក្នុងការប្តូររូបិយប័ណ្ណនិម្មិតនេះ ។ 

បុគ្គលដែលក្លាយជាគោលដៅទណ្ឌកម្មនេះដែរ គឺលោក Sim Hyon Sop សម្រាប់តួនាទីតំណាងឲ្យធនាគារ Kwangson Banking Corp គឺជាអង្គភាពមួយដែលកាលពីមុនត្រូវបានគេចាត់ថ្នាក់សម្រាប់ទណ្ឌកម្មអាមេរិក ។ 

សេចក្តីថ្លែងការណ៍នេះ និយាយទៀតថា លោក Wu ធ្វើឲ្យដំណើរការប្រតិបត្តិការជំនួញជាច្រើនដើម្បី ប្តូរ​រូបិយប័ណ្ណនិម្មិតតម្លៃរាប់លានដុល្លារ ៕ ដោយ ៖ សារ៉ាត់