នាយករដ្ឋមន្រ្តីអេស្តូនី លោកស្រី Kaja Kallas បានគាំទ្រការអំពាវនាវរបស់ទីក្រុងគីវ ដើម្បីចូលរួមជា​មួយសម្ព័ន្ធមិត្ត​យោធាណាតូ ឲ្យបានឆាបរហ័សតាមដែលអាចធ្វើទៅបាន អំឡុងដំណើរទស្សនកិច្ច​របស់លោកស្រី​ទៅកាន់​ប្រទេស​អ៊ុយក្រែន​ កាលពីថ្ងៃចន្ទ ។

លោកស្រី Kallas ដែលប្រទេសរបស់លោកស្រី គឺជាសមាជិកអង្គការណាតូ និងសហភាពអឺរ៉ុបនោះ បានជជែក​ពិភាក្សាការងារជាមួយប្រធានាធិបតីអ៊ុយក្រែនលោក Volodymyr Zelenskyy នៅទីក្រុងភាគពាយព្យ Zhytomyr និងបានចុះហត្ថលេខាលើសេចក្តីប្រកាសរួមជាមួយលោក ដើម្បីថ្កោលទោសការវាយលុករបស់រុស្ស៊ីទៅលើអ៊ុយក្រែន ។

សេចក្តីប្រកាសរួមនេះ និយាយថា ពួកយើងឯកភាពថា អ៊ុយក្រែនដ៏រឹងមាំ មានឯករាជ្យ និងវិបុលភាព គឺជាផ្នែក​មួយ​នៃគ្រួសារអឺរ៉ុប-អាត្លង់ទិក ហើយសមាជិកភាពសហភាពអឺរ៉ូប និងអង្គការណាតូរបស់ពួកគេ គឺចំាបាច់ខ្លាំងណាស់ សម្រាប់អនាគតសន្តិសុខអឺរ៉ុប ។

សេចក្តីប្រកាសបន្តទៀតថា ក្នុងបរិបទកិច្ចប្រជុំកំពូល Vilnius របស់អង្គការណាតូនៅខែកក្កដាខាងមុខ ពួកយើងឯកភាព​ធ្វើការរួមគ្នាដើម្បីបង្កើតវិថីដែលនឹងជួយឲ្យអ៊ុយក្រែនខិតកាន់តែជិតសមាជិកភាពអង្គការណាតូ និងត្រួសត្រាយផ្លូវ​ឲ្យអ៊ុយក្រែន ចូលរួមជាមួយណាតូ ឲ្យបានឆាប់រហ័សដូចដែលអាចធ្វើទៅបាន ។

លោក Zelenskyy ថ្លែងអំណរគុណផងដែរដល់ប្រទេសអេស្តូនី សម្រាប់ការគាំទ្រវិស័យការពារជាតិរបស់ពួកគេ ប៉ុន្តែលោកបាននិយាយយ៉ាងដដែលពីការទាមទារសុំការចែកចាយអាវុធឲ្យបានឆាប់រហ័សពីលោកខាងលិច ដើម្បីឲ្យពួកគេអាចពន្លឿនការបញ្ចប់សង្រ្គាមមួយនេះ ។

លោកបន្តថា អាយុជីវិតមនុស្ស គឺអាស្រ័យលើល្បឿន និងការអនុវត្តន៍ការសម្រេចចិត្តលើអាវុធ និងគ្រាប់រំសេវ ។ លោកមានការដឹងគុណចំពោះប្រទេសអេស្តូនី សម្រាប់ឆន្ទៈរបស់ពួកគេ ជួយសម្របសម្រួល​ទំនាក់ទំនងពាក់ព័ន្ធ​នឹងប្រទេសដៃគូផ្សេងទៀត ៕ ដោយ ៖ សារ់ាត់