រតនគិរី ៖ ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល និងលោក TANINAI Ichitomo អនុប្រធានបេសកកម្ម ស្ថានទូតជប៉ុន ប្រចាំព្រះរាជាណាចក្រកម្ពុជា បានអញ្ជើញ​សម្ពោធអគារមណ្ឌលសុខភាព ស្រែអង្គ្រង នៃការិយាល័យសុខាភិបាល ស្រុកប្រតិបត្តិបានលុង ដែលជាអំណោយដ៏ថ្លថ្លៃរបស់រដ្ឋាភិបាល និងប្រជាជនជប៉ុន តាមរយៈគម្រោង គូសាណូណិ នៅក្នុងឃុំស្រែអង្គ្រង ស្រុកកូនមុំ ខេត្តរតនគិរី នារសៀលថ្ងៃទី២៥ ខែមេសា ឆ្នាំ២០២៣នេះ។

ដោយយោងតាមរបាយការណ៍របស់ឯកឧត្តមអភិបាលខេត្តរតនគិរី បានបង្ហាញថា វិស័យសុខាភិបាលខេត្តបានរីកចម្រើនគួរជាទីមោទនៈ ដូចជា បានទប់ស្កាត់ការរីករាលដាលជំងឺកូវីដ-១៩ ដោយពុំមានករណីឆ្លងតាំងពីត្រីមាសទី២ ឆ្នាំ២០២២ រួមទាំងការចាក់វ៉ាក់សាំងកូវីដ-១៩ មណ្ឌលសុខភាពចំនួន៨៥% មានអគ្គិសនីប្រើប្រាស់ ហើយមណ្ឌលសុខភាព ១០០% មានទឹកស្អាតប្រើប្រាស់ (ទឹកអណ្តូង) ការអភិវឌ្ឍធនធានមនុស្ស និងការពង្រឹងគុណភាព ប្រសិទ្ធភាព សុវត្ថិភាព និងសមធម៌ នៃការផ្តល់សេវាប្រកបដោយក្រមសីលធម៌វិជ្ជាជីវៈ ការពង្រីកហេដ្ឋារចនាសម្ព័ន្ធសុខាភិបាល។

ក្នុងនាមក្រសួងសុខាភិបាល ឯកឧត្តមសាស្ត្រាចារ្យ ម៉ម ប៊ុនហេង សូមសំដែងការអបអរសាទរជាមួយប្រជាពលរដ្ឋខេត្តរតនគិរី ដែលបានទទួលអគារមណ្ឌលសុខភាពដ៏​ថ្មីស្រឡាង​មួយខ្នងទៀតនាពេលនេះ ជាមួយគ្នានេះ ក៏សូមពាំនាំនូវការនឹករលឹក និងសួរសុខទុក្ខដ៏ខ្ពង់ខ្ពស់ពីសំណាក់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ជូនចំពោះថ្នាក់ដឹកនាំ មន្ត្រីរាជការ អាជ្ញាធរមូលដ្ឋានគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ និងប្រជាពលរដ្ឋទូទាំង​ខេត្តរតនគិរី។ សមិទ្ធផលដ៏ធំធេងទាំងអស់នេះ កើតចេញពីការដឹកនាំប្រកបដោយស្មារតីបុរេសកម្ម ចក្ខុវិស័យវែងឆ្ងាយ ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណា ចក្រកម្ពុជា ជាពិសេសការរក្សាបានសន្តិភាព ស្ថិរភាពនយោបាយ សន្តិសុខសណ្តាប់ធ្នាប់ និងសុវត្ថិភាពសង្គម ការគ្រប់គ្រងបានជំងឺកូវីដ-១៩ ការរក្សាកំណើនសេដ្ឋកិច្ច និងលំនឹងជីវភាពប្រជាជន ការលើកកម្ពស់កិត្យានុភាពកម្ពុជានៅលើឆាកតំបន់និងអន្តរជាតិ តាមរយៈនយោបាយការបរទេសឯករាជ្យ ដោយផ្អែកលើច្បាប់ជាដើម។ ដូច្នេះតម្លៃសន្តិភាព ដែលកម្ពុជាកំពុងតែមាន និងខិតខំថែរក្សានៅពេលនេះ គឺពិតជាកត្តាសំខាន់បំផុត ដែលបងប្អូនជនរួមជាតិកម្ពុជាទាំងអស់ ត្រូវតែចងចាំជានិច្ច និងចូលរួមថែរក្សាការពារ សន្តិភាពនេះឱ្យឋិតថេរជាអមតៈ។

ឯកឧត្តម សាស្រ្តាចារ្យ ម៉ម ប៊ុនហេង បានបញ្ជាក់ទៀតថា សមិទ្ធផលថ្មីនាថ្ងៃនេះ គឺជាចំណងដៃដ៏ថ្លៃថ្លា សបញ្ជាក់ពីចំណងមិត្តភាព សាមគ្គីភាពជាប្រពៃណី រវាងកម្ពុជា-ជប៉ុន ដែលនឹងចូលរួមចំណែកយ៉ាងសំខាន់ដល់គោលនយោបាយរបស់រាជរដ្ឋាភិបាល ក្នុងការគ្របដណ្តប់សេវាសុខភាពជាសកល ជាពិសេសជូនដល់ប្រជាជនគ្រប់រូប ពោលគឺមិនទុកឱ្យប្រជាជនណាម្នាក់ មិនបានទទួលការថែទាំសុខភាពនោះឡើយ។

ឆ្លៀតក្នុងឱកាសនេះ ឯកឧត្តម រដ្ឋមន្រី្ត សូមថ្លែងអំណរគុណយ៉ាងជ្រាលជ្រៅជូនចំពោះរដ្ឋាភិបាលនិងប្រជាជនជប៉ុន ដែលបានផ្តល់ជំនួយដ៏ថ្លៃថ្លានេះ ជូនប្រជាជនខេត្តរតនគិរី។ សូមថ្លែងអំណរគុណដល់ក្រុមហ៊ុនសាងសង់ និងមន្ត្រីជំនាញទាំងអស់ ដែលបានខិតខំសម្រេចការសាងសង់តាមកាលវិភាគដែលបានគ្រោងទុក។ សូមថ្លែងអំណរគុណដល់អាជ្ញាធរមូលដ្ឋានគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ ដែលបានជួយឧបត្ថម្ភ សហការគាំទ្រការអនុវត្តគម្រោងសាងសង់អគារមណ្ឌលសុខភាព ស្រែអង្គ្រង បានសម្រេចដោយជោគជ័យ៕ អត្ថបទ ៖ រដ្ឋា​