នគរបាលទួរគី បានឃុំខ្លួនមនុស្សយ៉ាងហោចណាស់១២៦នាក់ សង្ស័យជាប់ពាក់ព័ន្ធនឹងក្រុមសកម្មប្រយុទ្ធឃឺដដែលបានហាមប្រាម មុនការបោះឆ្នោតដែលអាចទម្លាក់លោក President Recep Tayyip Erdoganចេញពីតំណែង។

សេចក្ដីរាយការណ៍របស់ទួរគី បាននិយាយថា ការចាប់ខ្លួនទូទាំង២១ខេត្ត ត្រូវបានសង្ស័យថាជាប់ពាក់ព័ន្ធនឹងការជួយផ្ដល់ហិរញ្ញវត្ថុ និងការជួយរើសកម្លាំងឲ្យក្រុមក្រៅច្បាប់​គណបក្សពលករឃឺដ( PKK)។

ជនសង្ស័យទាំងនោះ រួមទាំងមេធាវី អ្នកសារព័ត៌មាន និងអ្នកនយោបាយផងដែរ។

គណបក្សគាំទ្រក្រុមឃឺដដ៏សំខាន់ បាននិយាយថា ការចាប់ខ្លួននេះ ត្រូវបានរៀបចំឲ្យប៉ះពាល់ដល់ការបោះឆ្នោត។

នៅសល់ពេល១៩ថ្ងៃទៀត មុនការបោះឆ្នោត ជ្រើសរើសប្រធានាធិបតី និងសភា របស់ប្រទេសទួរគី គណបក្សប្រជាធិបតេយ្យប្រជាជន (HDP) បាននិយាយថា អ្នកឃុំខ្លួនទាំងនោះ រួមមានក្រុមមេធាវី ដែលអាចត្រួតពិនិត្យសន្តិសុខការបោះឆ្នោត អ្នកកាសែតឯករាជ្យ ដែលអាចរាយការណ៍ពីការបន្លំការបោះឆ្នោតដ៏សំខាន់ និងក្រុមអ្នករៀបចំយុទ្ធនាការរបស់គណបក្ស។

ទីភ្នាក់សារព័ត៌មានរដ្ឋ Anadolu របស់ទួរគី បាននិយាយថា អ្នកទាំងឡាយដែលបានចាប់ខ្លួនក្នុងការឆ្មក់ចូលកាលពីថ្ងៃអង្គារត្រូវបានជាប់ពាក់ព័ន្ធទៅនឹងការតវ៉ាតាមដងផ្លូវ ព្រមទាំងការចាប់ជំរិតក្មេង ហើយត្រូវបានដឹកនាំដោយក្រុមរដ្ឋអាជ្ញាសាធារណៈនៅ​ក្នុងទីក្រុង Diyarbakir សំបូរដោយជនជាតិភាគតិចឃឺដ៕