ក្រុមហ៊ុនមួយរបស់ប្រទេសជប៉ុន សង្ឃឹមថា នឹងចុះចតយានអវកាសគ្មានមនុស្សបើកបរ​នៅលើភពព្រះចន្ទ កាលពីថ្ងៃអង្គារទី២៥មេសា។ ប្រសិនបើការចុះចតបានជោគជ័យ បេសកកម្ម Hakuto-R M1 នឹងក្លាយជាដំណើរលើកដំបូងដែលក្រុមហ៊ុនឯកជនមួយ បានចុះចតនៅលើផ្ទៃរបស់ភពព្រះចន្ទ។

នៅពេលទៅដល់ទីនោះ យានអវកាសនេះ នឹងដាក់ពង្រាយរូបយន្តដែលមានទំហំប៉ុនគ្រាប់បាល់​តិននីស មានកង់ពីរដែលផលិតឡើងដោយក្រុមហ៊ុនផលិតរបស់ក្មេងលេងមួយរបស់ជប៉ុន និងយានអវកាសមួយមកពីអារ៉ាប់រួម។មានតែសហរដ្ឋអាមេរិក រុស្ស៊ី និងប្រទេសចិនប៉ុណ្ណោះ ដែលបានចុះចតយានអវកាសរបស់ខ្លួនបានដោយជោគជ័យនៅលើភពព្រះចន្ទ។

យានអវកាសនេះ ត្រូវបានគ្រោងចុះចតនៅម៉ោង១១ និង៤០យប់ថ្ងៃពុធនេះ ។

លោក Takeshi Hakamada អគ្គនាយកក្រុមហ៊ុន iSpace បានប្រាប់សារព័ត៌មាន BBC ថា លោក​សង្ឃឹមថា បេសកកម្មនេះ នឹងក្លាយជាចំណុចចាប់ផ្ដើមនៃបេសកកម្មពាណិជ្ជកម្ម​ជាបន្តបន្ទាប់។

លោកបាននិយាយថា លោកជឿថានេះតំណាងឲ្យការប្រែប្រែដ៏ធំ ។ វានឹងបើកឱកាសកាន់តែច្រើនសម្រាប់ក្រុមហ៊ុនឯកជនផ្សេងទៀតព្រមទាំងបណ្ដាប្រទេសតូចៗ ចូលទៅស្រាវជ្រាវនៅភពព្រះចន្ទនាពេលអនាគត។

យានអវកាសនេះ ត្រូវបានបាញ់បង្ហោះដោយយានចម្លងFalcon 9 ពីក្រុមហ៊ុន SpaceX របស់លោក Elon Musk កាលពីខែធ្នូឆ្នាំមុន ពីមជ្ឈមណ្ឌលបាញ់បង្ហោះយានអវកាសទីក្រុង Cape Canaveralរដ្ឋ Floridaសហរដ្ឋអាមេរិក៕