មន្ត្រីសហរដ្ឋអាមេរិក និយាយថា អ្នកផ្តើមគំនិតរបស់ក្រុមរដ្ឋអ៊ីស្លាម ដែលត្រូវបានគេគិតថា មានផែនការបំផ្ទុះគ្រាប់បែកដ៏មហន្តរាយ នៅអាកាសយានដ្ឋានទីក្រុងកាប៊ុល ត្រូវបានសម្លាប់ដោយក្រុមតាលីបង់ដែលកំពុងកាន់អំណាចនៅប្រទេសអាហ្វហ្គានីស្ថាន។

ការបំផ្ទុះគ្រាប់បែក កាលពីខែសីហាឆ្នាំ២០២១កន្លងទៅ បានបណ្តាលឲ្យជនស៊ីវិល១៧០នាក់ និងទាហានអាមេរិក១៣ស្លាប់​ ខណៈប្រជាជនកំពុងព្យាយាមភៀសខ្លួនចេញពីប្រទេស នៅពេល​ដែលក្រុមតាលីបង់ដណ្តើមកាន់អំណាច។

មន្ត្រីអាមេរិក បានប្រាប់សារព័ត៌មាន CBS ជាដៃគូសារព័ត៌មាន BBCថា មេដឹកនាំក្រុមរដ្ឋអ៊ីស្លាម ត្រូវបានសម្លាប់ជាច្រើន​សប្តាហ៍កន្លងទៅនេះ ប៉ុន្តែវាបានចំណាយពេលដើម្បីបញ្ជាក់ពីការ​ស្លាប់របស់​មេដឹកនាំក្រុមសកម្មប្រយុទ្ធនេះ។ ឈ្មោះរបស់មេដឹកនាំរូបនេះ មិនត្រូវបានចេញផ្សាយឡើយ។

មន្ត្រីអាមេរិក និយាយថា ពួកគេបានកំណត់តាមរយៈការប្រមូលរបាយការណ៍ចារកម្ម និងការពិនិត្យតំបន់ ដែលមេដឹកនាំរូបនេះស្លាប់ ទោះបីជាពួកគេពុំបានផ្តល់ព័ត៌មានលម្អិត​បន្ថែមលើបញ្ហាថា តើពួកគេបានដឹងដោយរបៀបណាថា មេដឹកនាំរូបនេះទទួលខុសត្រូវសម្រាប់​ការបំផ្ទុះគ្រាប់បែក។

យោងតាមការរាយការណ៍មួយក្នុងសារព័ត៌មាន the New York Times បានឲ្យដឹងថាសហរដ្ឋអាមេរិក បានដឹងពីការស្លាប់របស់មេដឹកនាំរូបនេះ ​កាលពីដើមខែមេសា។ ​សារព័ត៌មានបានរាយការណ៍ថា វានៅមិនទាន់ច្បាស់នោះទេថាតើ ​លោកគឺជាគោលដៅរបស់ក្រុមតាលីបង់ ឬថាតើលោកត្រូវ​បានសម្លាប់អំឡុងការប្រយុទ្ធគ្នា ​រវាងក្រុមរដ្ឋអ៊ីស្លាម ​និងក្រុមតាលីបង់។ កាលពីថ្ងៃចន្ទសហរដ្ឋអាមេរិក ចាប់ផ្តើមប្រកាសព័ត៌មានដល់ក្រុមគ្រួសាររបស់ទាហាន​ដែល​ត្រូវបានសម្លាប់ អំពីការស្លាប់របស់មេដឹកនាំក្រុមរដ្ឋអ៊ីស្លាមម្នាក់នេះ។