ភ្នំពេញ៖ ពិព័រណ៍ស្នាដៃគំនូរកុមារគាំទ្រយុទ្ធនាការ «BeyondTheGames‍‍‍» ចាប់ផ្តើមអនុញ្ញាតឱ្យសាធារណៈជនចូលទស្សនាពីថ្ងៃនេះ រហូតដល់ថ្ងៃទី២៨ខែមេសា ឆ្នាំ២០២៣។ ពិព័រណ៍នេះ ប្រារព្ធធ្វើឡើងនៅសួនច្បារ វិមាន​អនុស្សាវរីយ៍​ឈ្នះ ឈ្នះ ស្ថិតនៅរាជធានីភ្នំពេញ។

បើតាមសាធារណៈជនចូលរួមទស្សនាពិព័រណ៍ស្នាដៃគំនូរកុមារ​ នាថ្ងៃទី២៦ខែមេសានេះ បានប្រាប់BTVថា តាមការពិនិត្យមើលស្នាដៃគំនូរកុមារ ​ដែលតាំងបង្ហាញក្នុង​ពិព័រណ៍នេះ គឺមានភាពទាក់ទាញម្យ៉ាងម្នាក់ ​និងស្រស់ស្អាតប្លែកៗពីគ្នា។

កញ្ញា ហេង លីហ័រ ក្រុមការងារស្ម័គ្រចិត្តរៀបចំព្រឹត្តិការណ៍ប្រកួតស្នាដៃគំនូរកុមារ បានឱ្យដឹងថា នៅថ្ងៃដំបូងក្នុងពិព័រណ៍នេះ គឺមានកាគាំទ្រច្រើនពីសាធារណជន មានទាំងសិស្ស និស្សិត និងប្រជាពលរដ្ឋទូទៅ។លើសពីនេះ កញ្ញាបានបន្តថា ​គោលបំណងនៃការរៀបចំព្រឹត្តិការណ៍នេះ គឺដើម្បីជំរុញដល់កុមារចេះបង្កើតគំនិតច្នៃប្រឌិតថ្មីៗ ​ចេះស្រមើស្រមៃ និងបង្កើតភាពស្និតស្នាល​រវាងក្រុមគ្រួសារពួកគាត់ជាដើម។

ក្រសួងអប់រំ យុវជន និងកីឡា សហការជាមួយសហភាពសហព័ន្ធយុវជនកម្ពុជា បានរៀបចំ​ព្រឹត្តិការណ៍​ប្រកួតស្នាដៃគំនូរកុមារគាំទ្រយុទ្ធនាការBeyond The Games ក្រោមប្រធាន​បទ«បេះដូងលោតក្នុងចង្វាក់តែមួយ»។ នៅក្នុងព្រឹត្តិការណ៍នេះ មានការតាំងពិព័រណ៍​គំនូរកុមារ​ចំនួន២៤០ផ្ទាំង ដែលជ្រើសរើសពីគំនូរកុមារនៅសាលាបឋមសិក្សាទូទាំងប្រទេសកម្ពុជា ប្រមាណ១​ម៉ឺនផ្ទាំង។ សាធារណជន អាចបោះឆ្នោតគាំទ្រលើផ្ទាំងគំនូរទាំងឡាយ (អាចលើសពី១) ដោយការស្កេនលើ QR Code ដែលមាននៅលើផ្ទាំងគំនូរ។ គ្រឹះស្ថានសិក្សាអាចរៀបចំទស្សនកិច្ចសិក្សា ហើយសាធារណជនអាចចូលរួមទស្សនា ពិព័រណ៍​ស្នាដៃគំនូរកុមារគាំទ្រយុទ្ធនាការ​ BeyondTheGames ដើម្បីបង្ហាញភាសាបេះដូងសម្រាប់កម្ពុជា ៕ អត្ថបទ៖ទូច សោភ័ណ