អាមេរិក ៖ ក្រុមហ៊ុនថ្នាំជក់ British American Tobacco(BAT) នឹងត្រូវបង់ប្រាក់ជំងឺចិត្ត ៦៣៥លានដុល្លារ បន្ថែមពីលើការ​ប្រាក់ដល់ក្រុមអាជ្ញាធរសហរដ្ឋអាមេរិក ក្រោយក្រុមហ៊ុនមួយនេះ ទទួលស្គាល់ថា ពួកគេបានលក់បារីឲ្យកូរ៉េខាងជើង ជាការបំពានលើទណ្ឌកម្មអន្តរជាតិ ។ 

ក្រុមអាជ្ញាធរសហរដ្ឋអាមេរិក និយាយថា ការដោះស្រាយសំណងជំងឺចិត្តនេះ ពាក់ព័ន្ធនឹងសកម្មភាពរបស់ក្រុមហ៊ុន BAT នៅកូរ៉េខាងជើងចន្លោះឆ្នាំ ២០០៧ និងឆ្នាំ ២០១៧ ។ 

ប្រធានក្រុមហ៊ុន BAT លោក Jack Bowles បាននិយាយថា ពួកយើងពិតជាសោកស្តាយ​ណាស់ចំពោះការប្រព្រឹត្តខុស​បែបនេះ ។ 

គួរឲ្យដឹងថា សហរដ្ឋអាមេរិក បានដាក់ទណ្ឌកម្មយ៉ាងធ្ងន់ធ្ងរលើកូរ៉េខាងជើង ពាក់ព័ន្ធនឹងសកម្មភាពកម្មវិធី​មីស៊ីល​បាលីស្ទិក និងនុយក្លេអ៊ែររបស់ពួកគេ ។ 

ដំណោះស្រាយសំណងជំងឺចិត្តកាលពីថ្ងៃអង្គារ ត្រូវបានធ្វើឡើងរវាងក្រុមហ៊ុន BAT និងក្រសួងយុត្តិធម៌អាមេរិក (DOJ) ហើយនិងការិយាល័យគ្រប់គ្រង់ទ្រព្យសកម្មបរទេស(OFAC)នៃក្រសួងរតនាគារសហរដ្ឋអាមេរិក ។ 

 ក្រុមហ៊ុន BAT ស្ថិតក្នុងចំណោមក្រុមហ៊ុនថ្នាំជក់ពហុជាតិធំបំផុតរបស់ពិភពលោក និងស្ថិតក្នុងចំណោមក្រុមហ៊ុនធំៗ​បំផុតទាំង ១០របស់ចក្រភពអង់គ្លេស ។ ពួកគេគ្រប់គ្រងម៉ាកបារីធំៗជាច្រើន រួមទាំងបារី Lucky Strike, Dunhill និងបារី Pall Mall BAT បាននិយាយនៅក្នុងសេចក្តីថ្លែងការណ៍ថា ពួកគេឈានដល់កិច្ចព្រមព្រៀង​បណ្តឹងសាធារណៈ​ដែលបានពន្យារពេលជាមួយ DOJ និងកិច្ចព្រមព្រៀងដោះស្រាយសំណងរដ្ឋប្បវេណី ជាមួយ OFAC ហើយ​សាខាក្រុមហ៊ុន BAT នៅសិង្ហបុរី បានឈានដល់កិច្ចព្រមព្រៀងជាមួយ DOJ ផងដែរ ។ 

សូមបញ្ជាក់ថា មេដឹកនាំកូរ៉េខាងជើងលោក Kim Jong Un ត្រូវបានគេដឹងច្បាស់ថាជាអ្នកញៀនបារីខ្លាំង ។ កាលពីឆ្នាំមុន សហរដ្ឋអាមេរិក បានព្យាយាមជំរុញឲ្យក្រុមប្រឹក្សាសន្តិសុខអង្គការសហប្រជាជាតិដាក់​បំរាមការនាំចេញ​ថ្នាំជក់​ទៅកាន់​កូរ៉េខាងជើង ប៉ុន្តែត្រូវប្រើសិទ្ធិវេតូជំទាស់ដោយរុស្ស៊ី និងចិន ៕ ដោយ ៖ សារ៉ាត់