កេនយ៉ា ៖ ក្រោយរកឃើញសាកសពមនុស្សបន្ថែមទៀត ក្រុមអាជ្ញាធរនិយាយថា ចំនួនមនុស្សស្លាប់​សរុបនៅក្នុង​ចំណោមសាវ័កបង្អត់អាហារខ្លួនឯងរហូតដល់ស្លាប់ ដែលគេជឿថាពួកគេនឹងឡើងទៅឋានសួគ៌នោះ បានកើនឡើងដល់ ៨៩នាក់ ស្របពេលដែលផ្នូររាក់ៗ ត្រូវបានរកឃើញកាន់តែច្រើនអំឡុងប្រតិបត្តិការគាស់ផ្នូរនៅក្នុងដីព្រៃ Shakahola ទំហំជាង ៣២០ហិចតា ជាកន្លែងដែលព្រះវិហារ Good News International ស្ថិតនៅ។ 

ទីតាំងគាស់សាកសពមនុស្ស ត្រូវបានទបិទ ហើយក្រុមការងារសុទ្ធតែជាមនុស្សប្រុស ស្លៀកពាក់ឯកសណ្ឋាន​ការពារជំងឺកូវីដ និងពាក់ម៉ាស់ បានសែងសាកសពចេញដែលត្រូវបានគេវិចខ្ចប់នៅក្នុងថង់រុំសាកសពពណ៌ស. និងពណ៌ខៀវ ។

រដ្ឋមន្រ្តីក្រសួងមហាផ្ទៃកេនយ៉ានលោក Kithure Kindiki បានអំពាវនាវឲ្យដាក់ពន្ធនាគារមេដឹកនាំក្រុមសាសនាមួយនេះ អស់មួយជីវិត ហើយអ្នករាល់គ្នាដែលជួយបុគ្គលនោះក្នុងជីកផ្នូរ ឬយកសាកសពទៅបោះចោល គួរតែប្រឈម​នឹងទោស​ធ្ងន់ធ្ងរបំផុតក្រោមច្បាប់ផងដែរ ។ 

ភាគច្រើននៃសាកសព ត្រូវបានរកឃើញនៅក្នុងផ្នូររាក់ៗ ខណៈដែលមនុស្សមួយចំនួន ត្រូវបានរកឃើញនៅរស់ ហើយស្គមស្គាំងប៉ុន្តែក្រោយមកពួកគេក៏ស្លាប់ទៅ ។  

លោក Kindiki និយាយថា មនុស្ស ៣នាក់ត្រូវបានជួយសង្រ្គោះនៅរស់ ដែលនាំឲ្យអ្នករស់រានសរុបក្រោមត្រូវរក​ឃើញមកទល់នឹងពេលនេះ កើនឡើងចំនួន ៣៤នាក់ ។ 

ចំនួនមនុស្សស្លាប់ អាចនឹងកើនឡើងបន្ថែមទៀត ហើយកាកបាទក្រហមកេនយ៉ា និយាយថា មនុស្សជាង ២០០នាក់ ត្រូវបានរាយការណ៍ថា កំពុងបាត់ខ្លួន ៕ ដោយ ៖ សារ៉ាត់