ស្វាយរៀង៖ ឯកឧត្តម ម៉ែន វិបុល អភិបាលខេត្តស្វាយរៀង បានថ្លែងថា ក្នុងការអនុវត្តគម្រោងសម្បទានដីសង្គមកិច្ច កំពុងសាងសង់ផ្ទះចំនួន១០០ខ្នង ក្នុងជំហានទី១ ឆ្នាំ២០២៣ ជូនដល់អតីតកងកម្លាំងប្រដាប់អាវុធ និងគ្រួសារកងទ័ព និងនគរបាលជាតិ គ្រួសារយុទ្ធជនពលី មរណៈ និងពលរដ្ឋក្រីក្រ នៅតាមបន្ទាត់ព្រំដែនកម្ពុជា-វៀតណាម ។

ក្នុងសន្និសីទសារព័ត៌មានស្តីពី ភាពជោគជ័យ ក្នុងរយៈពេល៥ឆ្នាំ របស់រដ្ឋបាលខេត្តស្វាយរៀង នៅថ្ងៃទី២៧ ខែមេសា ឆ្នាំ២០២៣ ឯកឧត្តមអភិបាលខេត្ត មានប្រសាសន៍ថា ការសាងសង់នេះ ធ្វើឡើងនៅលើផ្ទៃដីចំនួនប្រមាណ ៣០០ហិកតា ស្ថិតក្នុងឃុំត្នោត ស្រុកកំពង់រោទិ៍ និងឃុំចន្ទ្រា ស្រុកចន្ទ្រា ដោយមានការជីកស្រះទឹក ប្រឡាយ បុកអណ្ដូង និងសាងសង់នូវហេដ្ឋារចនាសម្ព័ន្ធ ដើម្បីគាំទ្រដល់គម្រោងនេះ ។

ឯកឧត្តម បានបន្តថា កាលពី២០១៧ និងឆ្នាំ២០១៩ គណៈកម្មាធិការសម្បទានដីសង្គមកិច្ចថ្នាក់ជាតិ បានសម្រេចប្រគល់គម្រោងសម្បទានដីសង្គមកិច្ច ចំនួន២កន្លែង នៅខេត្តស្វាយរៀង ជូនដល់អតីត​កងកម្លាំងប្រដាប់អាវុធ និងគ្រួសារ កងទ័ព និងនគរបាលជាតិ គ្រួសារយុទ្ធជនពលី មរណៈ និងពលរដ្ឋក្រីក្រ ។

ឯកឧត្តម ម៉ែន វិបុល បានបន្ថែមថា គម្រោងនេះ បានអនុវត្តនៅភូមិជីកដី ឃុំអណ្ដូងត្របែក ស្រុករមាសហែក ដោយសាងសង់ផ្ទះចំនួន ៤០០ខ្នង លើផ្ទៃដីចំនួន ១៥៣,៦៥ហិកតា ដែលចែកចេញជា ២ជំហាន គឺនៅឆ្នាំ២០១៧ ចំនួន២០០ខ្នង និងឆ្នាំ២០១៩ ចំនួន២០០ខ្នង ។

គួរបញ្ជាក់ថា សម្ដេចតេជោ ហ៊ុន សែន នាយករដ្ឋមន្ត្រី ​នាពេលកន្លងទៅ បានណែនាំដល់​គណៈកម្មាធិការសម្បទានដីសង្គមកិច្ចថ្នាក់ជាតិ ដែលមានឯកឧត្តមឧបនាយករដ្ឋមន្ត្រី ជា សុផារ៉ា ជាប្រធាន ផ្ដល់ជូនដីសម្បទានដីសង្គកកិច្ច និងសាងសង់ផ្ទះ ជូនដល់អតីតកងកម្លាំងប្រដាប់អាវុធ និងគ្រួសារ កងទ័ព និងនគរបាលជាតិ គ្រួសារយុទ្ធជនពលី មរណៈ និងពលរដ្ឋក្រីក្រ នៅតាមព្រំដែន រួមទាំងអភិវឌ្ឍន៍នូវហេដ្ឋារចនាសម្ព័ន្ធផ្សេងៗ ៕អត្ថបទ បាន សុខរិទ្ធិ