ភ្នំពេញ៖ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ រួមទាំងមន្រ្តីរាជការសរុបចំនួនជិត ៤០០នាក់ បានចូលរួមពិធីបរិច្ចាគឈាម ដើម្បីសង្គ្រោះអាយុជីវិតមនុស្សជាតិ ក្រោមប្រធានបទ «ផ្តល់ឈាម សង្គ្រោះជីវិតខ្ញុំ» ដែលរៀបចំឡើង កាលពីថ្ងៃទី២៦ មេសា ឆ្នាំ២០២៣កន្លងទៅ នៅទីស្ដីការក្រសួង។

នៅក្នុងពិធីនេះ ឯកឧត្តមរដ្ឋមន្ត្រី បានមានប្រសាសន៍ថា នេះជាការបរិច្ចាគឈាមដ៏មាន​សារៈសំខាន់ណាស់​សម្រាប់សង្គ្រោះអាយុជីវិតមនុស្សជាតិ។

ករណីនេះឯកឧត្តម លើកទឹកចិត្តដល់មន្ត្រីរាជការ និងជាពិសេសបងប្អូនយុវជន​ដែលមាន​សុខភាពល្អ ​ចូលរួមបរិច្ចាគឈាមដល់អ្នកត្រូវការឈាម ​ដើម្បីជួយសង្គ្រោះអាយុជីវិតមនុស្សជាតិ។ បន្ថែមពីនេះ ​ឯកឧត្តម បានស្នើទៅមជ្ឈមណ្ឌលជាតិផ្តល់ឈាម គួរផ្តល់មេដាយសម្រាប់អ្នក​ផ្តល់​ឈាមចាប់ពី ៥ដងឡើងទៅ និងត្រូវមានការយកចិត្តទុកដាក់ពីវិស័យ ​ឯកជនផងដែរ។

លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាម លើកឡើងថា ការលះបង់របស់ថ្នាក់​ដឹកនាំ មន្ត្រីរាជការ និងនិស្សិត ដែលបានចូលរួមបរិច្ចាគឈាម ​មានសារៈសំខាន់ណាស់សម្រាប់​សង្គ្រោះអាយុជីវិតមនុស្សជាតិដែលត្រូវការឈាម។ ករណីនេះ លោកអំពាវនាវឱ្យមានការ​ចូលរួមនូវយុទ្ធនាការផ្សេងៗនៅថ្ងៃខាងមុខ។

លោកបន្ថែមទៀតថា ការបរិច្ចាគឈាមដោយមិនគិតកម្រៃ គឺជាវប្បធម៌មនុស្សជាតិ និង​មនុស្សធម៌​នៅក្នុងសង្គមជាតិ ដោយផ្សារភ្ជាប់នឹងការមិនរើសអើងពូជសាសន៍​ និងសាសនា។ បន្ថែមពីនេះ ការបរិច្ចាគឈាមមិនប៉ះពាល់ដល់សុខភាពនោះទេ ដោយមានតែឈាមមួយគត់ មិនមានរោងចក្រ​ឱសថណាផលិតបាននោះឡើយ។

សូមបញ្ជាក់ថា គិតក្នុងឆ្នាំ២០២២​ កម្ពុជាត្រូវការឈាមមួយប្លោកជួយសង្គ្រោះជីវិតរៀងរាល់ ៦នាទីម្តង។​ តម្រូវការឈាមប្រចាំថ្ងៃសរុបជាង ២៥០ប្លោក ​នៅរាជធានីភ្នំពេញ និង ១០ម៉ឺនប្លោក នៅទូទាំងប្រទេស។ ​បើយោងតាមទិន្នន័យអង្គការសុខភាពពិភពលោក ការទទួលឈាម​តាមរយៈមនុស្សធម៌ដោយមិនគិតកម្រៃ​ ឆ្លើយតបប្រហែល ១០% នៃប្រទេសកម្ពុជាតែប៉ុណ្ណោះ ខណៈដែលប្រទេសជិតខាង ការបរិច្ចាគឈាមស័្មគ្រចិត្តអាចផ្គត់ផ្គង់រហូតដល់លើសពី ៩០%នៃតម្រូវការ៕