ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានទទួលជួប​ពិភាក្សាការងារជាមួយនាយកប្រតិបត្តិវិទ្យាស្ថានបណ្តុះបណ្តាល និងស្រាវជ្រាវដើម្បីអភិវឌ្ឍន៍កម្ពុជា (CDRI) ដែលប្រព្រឹត្តទៅ នៅទីស្តីការក្រសួង។

ក្រសួងកសិកម្ម នៅក្រោយចប់ជំនួបនេះ នាព្រឹកថ្ងៃទី២៧ មេសា ឆ្នាំ២០២៣នេះ បានឲ្យដឹងថា ក្នុងកិច្ចប្រជុំនេះ ឯកឧត្តមរដ្ឋមន្ត្រី​បានណែនាំឱ្យមានការយកចិត្តទុកដាក់ជំរុញការផលិតផលិតផល​កសិកម្មឱ្យមានគុណភាព តាមស្តង់ដារ និងតម្រូវការទីផ្សារ។

ទាក់ទងនឹងការងារនេះដែរ ឯកឧត្តម បានស្នើឱ្យវិទ្យាស្ថានបណ្តុះបណ្តាល និងស្រាវជ្រាវដើម្បី​អភិវឌ្ឍន៍​កម្ពុជា សហការចូលរួមក្នុងការសិក្សាវិភាគសេដ្ឋកិច្ច តម្រូវការទីផ្សារ និងស្រាវជ្រាវលើការ​ប្រើប្រាស់បច្ចេកវិទ្យា (Digitalization) ដែលជួយសម្រួលក្នុងខ្សែច្រវាក់តម្លៃ តាំងពីអ្នកផលិតរហូតអ្នក​ប្រើប្រាស់ តាមរយៈប្រព័ន្ធមួយ ដែលកសិករអាចបំពេញបានដោយខ្លួនឯង ព្រមទាំងភាព​ច្នៃប្រឌិតថ្មីៗ (Innovation) ដែលជួយដល់ផលិតកម្មកសិកម្មដូចជាគ្រឿងម៉ាស៊ីន​ ផ្ទះសំណាញ់ និងកសិដ្ឋានឆ្លាតវៃ (Smart Farm) ជាដើម។

បើតាមឯកឧត្តមរដ្ឋមន្ត្រី គោលដៅនៃការងារនេះ ​គឺដើម្បីបង្កើនជីវភាពប្រជាពលរដ្ឋ តាមរយៈការ​ដាក់ចេញផែនការកសិកម្មច្បាស់លាស់ ​ឈានទៅធានាបាននូវសន្តិសុខស្បៀង ដែល​អាច​ឱ្យកសិករបន្តការដាំដុះ រក្សាបានតម្លៃថេរនៃកសិផលនៅក្នុងស្រុក និងតម្លៃខ្ពស់សម្រាប់​កសិផលនាំចេញ៕