ម៉ុនតាណា ៖ សភាដែលគ្រប់គ្រងសំឡេងភាគច្រើនដោយគណបក្សសាធារណរដ្ឋរបស់រដ្ឋម៉ុនតាណាបានបោះឆ្នោត​

កាលពីថ្ងៃពុធដើម្បីដាក់​បម្រាមដល់សមាជិកសភាមួយរូបនាង Zooey Zephyr ដែលបាននិយាយថាសមាជិកសភា

សាធារណរដ្ឋនឹងមានដៃប្រឡាក់ដោយ"ឈាម"ព្រោះតែអនុម័តសេចក្ដីស្នើច្បាប់​រឹតត្បិត​សិទ្ធិអ្នកកែភេទ​និងបាន​ប្រមូល​ផ្តុំក្រុមអ្នកតវ៉ា។

អ្នកនាង Zephyr សមាជិកសភាគណបក្សប្រជាធិបតេយ្យអាយុ ៣៤ ឆ្នាំមកពីទីក្រុង Missoula ដែលកាលពី​ឆ្នាំមុនបាន​ក្លាយជាស្ត្រីកែភេទដំបូងគេ ដែលត្រូវបានជ្រើសតាំងនៅក្នុងសភារបស់រដ្ឋម៉ុនតាណា នឹងត្រូវបាន​អនុញ្ញាតឱ្យ​រក្សា​អាសនៈរបស់នាងនិងបោះឆ្នោតពីចម្ងាយ ក្រោមវិធានការវិន័យដែលបានអនុម័តលើការបោះឆ្នោត ៦៨ទល់នឹង៣២ កាលពីថ្ងៃពុធ។ ប៉ុន្តែអ្នកនាងនឹងមិនអាចចូលរួមក្នុងការពិភាក្សាដេញដោលបានទេ។

ចំណាត់ការរបស់ក្រុមសភាសាធារណរដ្ឋនៅរដ្ឋម៉ុនតាណានេះ ធ្វើឡើងតែប៉ុន្មានសប្តាហ៍ប៉ុណ្ណោះ បន្ទាប់ពីសមាជិក​សភាគ​ណបក្សប្រជាធិបតេយ្យពីរនាក់នៅរដ្ឋ Tennessee ត្រូវបានបណ្តេញចេញ ជុំវិញការតវ៉ារបស់ពួក​គេនៅសភា​ទាមទារឱ្យមានចំណាត់ការដោះស្រាយអំពើហិង្សាដោយអាវុធបន្ទាប់ពីការបាញ់ប្រហារសម្រាប់​រង្គាល​នៅ​សាលារៀន​ក្រុងNashville ។

អ្នកនាង Zephyr ដែលត្រូវបានផ្តល់ពេល៥នាទីដើម្បីថ្លែងទៅកាន់សភាមុនការបោះឆ្នោត បាននិយាយថា សមាជិក​គណបក្សសាធារណរដ្ឋដែលមានសំឡេងភាគច្រើន នៅក្នុងសភា និងព្រឹទ្ធសភារបស់រដ្ឋម៉ុនតាណា កំពុងប្រើប្រាស់​សកម្មភាពនេះជា "ឧបករណ៍គៀបសង្កត់សង្កិន" និងថាការរឹតត្បិតមកលើរូបនាងក្នុងការថ្លែងសុន្ទរកថា និងរឹតត្បិតក្រុម​អ្នកតវ៉ាដែលគាំទ្ររូបនាងគឺ"ជាការបំផ្លាញប្រជាធិបតេយ្យ" ៕ ដោយ ៖ ស្រីទាវ