​បាល់ទាត់៖ ​ទីបំផុត Manchester City បាន​ស្គា​ល់វគ្គ​ផ្តាច់ព្រ័ត្រ UEFA Champions League លើកដំបូង​ហើយ ​ក្រោយ​យកឈ្នះ​ក្រុម​ជើងឯក​បារាំង Paris Saint Germain​ ជើង​ទី​ពីរ ២-០​។ បន្ទាប់ពី​នាំមុខ ២-១ ពី​ជ័យជំនះ​នៅ​ទឹកដី​បារាំង ជើង​ទី២ នៅ​ទឹកដី​អង់គ្លេស​នេះ​មាន​ព្រិល​ធ្លាក់​ខុសរដូវ​ តែ​មិនបាន​បង្អាក់​ដំណើរការ​ប្រកួត​ឡើយ​។​

​​ខ្សែប្រយុទ្ធ​អាល់​ហ្សេ​រី Riyad Mahrez ​បាន​ក្លាយជា​តួអង្គ​សំខាន់​ក្នុងការ​ប្រកួត ​ក្រោយ​ស៊ុត​បញ្ចូល​ទី​ពីរ​គ្រាប់​ដោយការបញ្ជូន​របស់​អ្នក​ចា​ទី Ederson ​គ្រាប់​ដំបូង និង Phil Foden ​គ្រាប់​ទី ២​។ ​Paris Saint Germain ​ដែល​មិនមាន​វត្តមាន​ខ្សែប្រយុទ្ធ​បារាំង Kylian Mbappe ​ដោយសារ​របួស​នោះ​ មិនអាច​រក​គ្រាប់​បាល់​បាន​នៅ​ទឹកដី​ Eithad​ ឡើយ និង​ថែមទាំង​បាត់បង់​កីឡាករ​ម្នាក់ទៀត​នៅពេល Angel di Maria ទទួលបាន​កាត​ក្រហម​។ ​អ្នកចាត់ការ PSG លោក Mauricio Pochettino ​ក្រោយ​ចប់​ការប្រកួត​បាន​សំដែង​អារម្មណ៍​មិន​សប្បាយចិត្ត ​ក្រោយ​បរាជ័យ​នេះ ហើយ​អវត្តមាន​របស់ Mbappe​ ក៏​មិនមែនជា​ហេតុផល​នៃ​បរាជ័យ​នេះ​។ ​ចំណែក​លោក Pep Guardiola ការឈាន​ឡើង​វគ្គ​ផ្តាច់ព្រ័ត្រ​លើក​នេះ អតីត​អ្នកចាត់ការ Barcelona រូបនេះ​និយាយ​នឹករលឹក​ដល់​កីឡាករ​ចាស់ ​ដែល​បាន​ចាកចេញ​កន្លងទៅ​ដូចជា Joe Hart, Zabaleta, Vincent Kompany​ និង David Silva ជាដើម ដោយ​គិត​ថាបើ​គ្មាន​អ្នក​ទាំងនោះ Manchester City ក៏​មិន​អាចឈាន​ដល់ពេល​នេះឡើយ​។

​​ការឈាន​ឡើង​វគ្គ​ផ្តាច់ព្រ័ត្រ​របស់ Manchester City បាន​ក្លាយជា​ក្លិប​អង់គ្លេស​ទី៩ ដែល​ឈានឡើង​វគ្គ​ផ្តាច់ព្រ័ត្រ​ European Cup រឺ Champions League ច្រើនជាង​លី​គ​ផ្សេងៗ​រួមមានអាល្លឺម៉ង់ និង​អ៊ីតាលី​ដែលមាន​ត្រឹម ៦ក្លិប​។ ​Manchester City មានពេល ៣សប្តាហ៍​ដើម្បី​ត្រៀមខ្លួន​សំរាប់​វគ្គ​ផ្តាច់ព្រ័ត្រ​នៅ​ថ្ងៃទី២៩ ខែឧសភា​នេះ​នៅ​ទីក្រុង Istanbul ប្រទេស​ទួរគី​ រង់ចាំ​អ្នកឈ្នះ​យប់​នេះ​រវាង Chelsea និង Real Madrid៕

​អត្ថបទ​៖​នាង សុភា​វុ​ធ