អុីរ៉ង់ ៖B សារព័ត៌មានរដ្ឋ រាយការណ៍ថា បុព្វជិតជាន់ខ្ពស់មូស្លីមនិកាយស៊ីយ៉ាម្នាក់របស់អ៊ីរ៉ង់ និងជា​សមាជិក​ក្នុង​សភាអ្នកជំនាញ ត្រូវបានខ្មាន់កាំភ្លើងបាញ់សម្លាប់នៅតំបន់ភាគខាងជើងអ៊ីរ៉ង់ ។

លោក Ayatollah Abbasali Soleimaniបានស្លាប់នៅក្នុងមន្ទីរពេទ្យ ក្រោយរងការបាញ់ប្រហារ​នៅធនាគារ​មួយ​កន្លែង​ស្ថិតក្នុងទីក្រុង Babolsar ខេត្ត Mazandaran ។

អភិបាលក្រុង Babolsar និយាយថា ខ្មាន់កាំភ្លើងដែលត្រូវបានចាប់ខ្លួន គឺជាសន្តិសុខធនាគារ ហើយមូល​ហេតុដែលនាំ​ឲ្យឈានទៅរកការបាញ់ប្រហារនេះ ពុំត្រូវបានគេដឹងច្បាស់នោះទេ ។

លោក Ayatollah Soleimani ស្ថិតក្នុងចំណោមបុព្វជិត ៨៨រូបនៅក្នុងសភាអ្នកជំនាញ គឺជាអង្គបោះឆ្នោតមួយ ដែលត្រូវ​តែង​តាំងមេដឹកនាំកំពូលអ៊ីរ៉ង់ ។

អង្គបោះឆ្នោតមួយនេះ នឹងតាមដានផងដែររាល់សកម្មភាពរបស់លោក ហើយផ្អែកលើទ្រឹស្តីបទ ពួកគេអាច​ដកតំណែង​របស់លោកបាន បើសិនជាលោកគ្មានសមត្ថភាពបំពេញការងាររបស់លោក ។

កាលពីមុនលោកធ្លាប់ជាអ្នកតំណាងផ្ទាល់ខ្លួនផងដែររបស់មេដឹកនាំកំពូលបច្ចុប្បន្ន លោក Ayatollah Ali Khamenei នៅខេត្តភាគអាគ្នេយ៍ Sistan-Baluchistanដោយរូបលោកលាលែងពីតំណែងកាលពីឆ្នាំ ២០១៩ ក្រោយបំពេញ​ការងារអស់រយៈពេល ១៧ឆ្នាំ ។

លោក Ayatollah Soleimani ដែលស្ថិតក្នុងវ័យ ៧០ឆ្នាំប្លាយ បានធ្វើដំណើរទៅកាន់ធនាគារ Belli កាលពីវេលាម៉ោង ១០ និង៣០នាទីព្រឹក ម៉ោងក្នុងស្រុក ថ្ងៃពុធ ត្រូវនឹងម៉ោង ៧ម៉ោងសកល ពេលដែលលោករងការបាញ់ប្រហារ ៕ ដោយ ៖ សារ៉ាត់