ភ្នំពេញ៖ សហភាពសហព័ន្ធយុវជនកម្ពុជា (ស.ស.យ.ក) បានសហការជាមួយដៃគូផ្សេងៗ នឹងរៀបចំព្រឹត្តិការណ៍ Beyon The Games’ Day នៅថ្ងៃទី២៨ ខែមេសា ឆ្នាំ២០២៣ស្អែកនេះ នាសួនច្បារ វិមានអនុស្សាវរីយ៍ ឈ្នះ ឈ្នះ ដោយកម្មវិធីនេះ មានរៀបចំនូវបេះដូងក្រដាស អបអរព្រឹត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដែលកម្ពុជាធ្វើជាម្ចាស់ផ្ទះ ។

បើតាមយុវជន នៃសហភាពសហព័ន្ធយុវជនកម្ពុជា ក្រុមការងាររៀបចំបេះដូងក្រដាស បានឲ្យដឹងថា ចំពោះបេះដូងក្រដាស ដែលបិទនៅវិមានអនុស្សាវរីយ៍ ឈ្នះ ឈ្នះ នេះ មិនមានកំណត់ចំនួននោះទេ ហើយក៏មិនមានបេះជារូបរាងអ្វីនោះដែរ គ្រាន់តែបិទនៅក្នុងសួន សម្រាប់ឲ្យប្រជាពលរដ្ឋ និងភ្ញៀវទេសចរណ៍មកមើល និងថតរូបកម្សាន្តប៉ុណ្ណោះ ។

ក្រុមការងារដដែល បន្តថា ការរៀបចំបិទបេះដូងនេះ ចាប់ផ្ដើមតាំងពីថ្ងៃទី២៦ ខែមេសា និងចាប់ផ្ដើមមានពលរដ្ឋ និងភ្ញៀវទេសចរមកមើលកម្សាន្ត និងផ្ដិតរូបជាទុកជាអនុស្សាវរីយ៍​បណ្ដើរៗហើយ ។

សម្រាប់ពលរដ្ឋមកលេងវិមានអនុស្សាវរីយ៍ ឈ្នះ ឈ្នះ លើកឡើងថា ពួកគេមិនបានទៅ​លេងកម្សាន្ត និងទស្សនាការរៀបចំរូបបេះដូងក្រដាស ប្រមាណជិត ៤លាន នៅប្រាសាទអង្គរវត្ត កាលពីពិធីបុណ្យចូលឆ្នាំនោះទេ ប៉ុន្តែបានមកឃើញនៅទីនេះ ក៏មានសេចក្តីរំភើបរីករាយ ហើយសូមអរគុណដល់ ស ស.យ.ក ដែលបានរៀបចំ ។

បើតាមឯកឧត្តម សុខ សប្បាយណា ប្រធានក្រុមការងារប្រតិបត្តិនៃយុទ្ធនាការ Beyond The Games បានឲ្យដឹងថា ព្រឹត្តិការណ៍ Beyon The Games’ Day ធ្វើតែមួយថ្ងៃប៉ុណ្ណោះ គឺនៅថ្ងៃទី២៨ ខែមេសា ដើម្បីផ្សព្វផ្សាយពីភាព នៃម្ចាស់ផ្ទះរៀបចំព្រឹត្តិការណ៍ស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ក៏ដូចជាបង្ហាញពីការរួបរួមគ្នា បេះដូងតែមួយរបស់ពលរដ្ឋកម្ពុជា ទៅកាន់ពិភាពលោក ។

ឯកឧត្តម បានបន្តថា ប៉ុន្តែសម្រាប់រូបបេះដូងក្រដាសនេះនឹងដាក់បន្ត ខណៈព្រឹត្តិការណ៍ Beyon The Games’ Day នឹងមានការប្រគុំតន្រ្តី ដែលចូលរួមពីតារាចំនួន ១១ជាតិសាសន៍ ​នៅក្នុងតំបន់អាស៊ាន ចូលរួមច្រៀងអបអរ រួមទាំងការតាំងពិព័រណ៍នូវផលិតផល និងគំនូស្នាដៃរបស់កុមារជាដើម ៕ អត្ថបទ បាន សុខរិទ្ធិ