ឧត្តរមានជ័យ៖ ប្រជាពលរដ្ឋចំនួនពីរភូមិរស់នៅចំណុចភូមិភ្នៀត និងភូមិសំរោង សង្កាត់សំរោង ក្រុងសំរោង ខេត្តឧត្តរមានជ័យ សម្ដែងក្ដីត្រេកអរ បន្ទាប់ពីទទួលបានផ្លូវចំនួន៣ខ្សែ ប្រវែងជាង១គីឡូម៉ែត្រ ប្រភេទផ្លូវកៅស៊ូជាគម្រោងកញ្ចប់ថវិការជុសជួលឡើងវិញ របស់រដ្ឋបាលខេត្តឧត្តរមានជ័យ នាព្រឹកថ្ងៃទី២៨ខែមេសា ឆ្នាំ២០២៣នេះ។
លោក យាយ ឡាយ រស់នៅចំណុចភូមិភ្នៀត បានរៀបរាប់ថា មុនៗផ្លូវក្នុងមូលដ្ឋានរបស់គាត់ពេលភ្លៀងរដូវវស្សាមានការលំបាកខ្លាំងជិះរអិលពិបាក ក្នុងការធ្វើដំណើរ ប៉ុន្តែពេលនេះ បានអាជ្ញាធរខេត្ត ជួយជួសជុលឲ្យមានភាពល្អប្រសើរឡើងវិញ ដោយការចាក់ផ្លូវកៅស៊ូធ្វើឲ្យរូបគាត់ក៏ដូចជាអ្នកភូមិផ្សេងៗទៀតត្រេកអរសប្បាយរីករាយ។
លោកអ៊ុន សុភ័ក្រ អភិបាលរងខេត្តឧត្តរមានជ័យ និងជាអ្នកនាំពាក្យរបស់សាលាខេត្តឧត្តរមានជ័យ បានបញ្ជាក់ថា ដោយមើលឃើញពីការលំបាកធ្វើដំណើរ និងដឹកកសិកផលនានារបស់បងប្អូនប្រជាពលរដ្ឋក្នុងមូលដ្ឋានកន្លងមក រដ្ឋបាលខេត្តបានសិក្សាគម្រោងដើម្បីធ្វើការជួសជុលផ្លូវពីគ្រួសក្រហមមកជាផ្លូវកៅស៊ូវវិញទាំងបីខ្សែ ដើម្បីធានាការជាប់ធនរឹងបានយូរអង្វែង។
លោកបន្តថា កត្ដាទាំងអស់នេះហើយ គឺជាការគិតគូរយកចិត្តទុកដាក់ខ្ពស់ពីរាជរដ្ឋាភិបាលនិងអាជ្ញាធរថ្នាក់ក្រោម ចំពោះសុខទុក្ខរបស់ប្រជាពលរដ្ឋ នៅតាមមូលដ្ឋានទាំងអស់ ដើម្បីអភិវឌ្ឍន៍ឲ្យមានការរីកចម្រើនបានលើគ្រប់វិស័យ៕