អន្តរជាតិ ៖ ឪពុកម្តាយរបស់ឧក្រិដ្ឋជនបាញ់ប្រហារធនាគារ Louisville លោក Connor Sturgeon កំពុងសម្ដែងការ​សោកស្ដាយ​ក្នុង​បទសម្ភាសន៍ថ្មីមួយជាមួយសារព័ត៌មាន NBC ដោយចែករំលែកពីពេលវេលាដែល​ឈានទៅ​ដល់ការបាញ់ប្រហារដ៏សាហាវនោះ ព្រមទាំងមធ្យោបាយដែលពួកគេត្រូវដោះស្រាយ​នឹងសោកនាដកម្មដែល​មិនអាចថ្លែងបាននេះ។

លោក Todd និងអ្នកស្រី Lisa Sturgeon បាននិយាយថា ពួកគេដឹងថាកូនប្រុសរបស់ខ្លួនឈ្មោះ Connor Sturgeon កំពុងប្រឈមមុខនឹងបញ្ហាសុខភាពផ្លូវចិត្ត តែអ្វីដែលពួកគេមិនបានដឹងនោះគឺថាគេហ៊ាន​ធ្វើការបាញ់​ប្រហារសម្លាប់​រង្គាលនោះ។

លោក Connor Sturgeon អាយុ ២៥ ឆ្នាំបានសម្លាប់មនុស្ស ៥ នាក់និងរបួស ៨ នាក់ទៀតនៅធនាគារជាតិចំណាស់មួយជា​កន្លែងធ្វើការងាររបស់គេ នៅទីក្រុង Louisville រដ្ឋ Kentucky កាលពីថ្ងៃទី១០ ខែមេសា។ ជនដៃដល់បានប្រើកាំភ្លើង AR-15 ទិញដោយស្របច្បាប់ ខណៈដែលបុគ្គលិកមួយចំនួនបានជួបជុំគ្នាដើម្បីប្រជុំ​នៅពេលព្រឹកមុន​ធនាគារបើក​បម្រើការជូន​សាធារណជន។

សោកនាដកម្មនេះគឺជាការបាញ់ប្រហារមួយក្នុងចំនោមការបាញ់ប្រហារសម្លាប់រង្គាលយ៉ាងហោចណាស់ចំនួន១៧២ករណី នៅសហរដ្ឋអាមេរិកមកទល់ពេលនេះ នេះបើយោងតាមអង្គការឃ្លាំមើលហិង្សាដោយអាវុធ ដែលកំណត់ការបាញ់ប្រហារ​សម្លាប់រង្គាលនេះថាជាករណីបាញ់ប្រហារដែលបណ្តាលឲ្យមនុស្សស្លាប់ចាប់ពីបួននាក់ទឡើង ដោយមិនរាប់​បញ្ចូល​ខ្មាន់កាំភ្លើង​នោះទេ៕ ដោយ ៖ ស្រីទាវ