កេនយ៉ា ៖ ក្រុមអាជ្ញាធរកេនយ៉ា បានចាប់ខ្លួនគ្រូគង្វាលម្នាក់ទៀតដែលប្រឈមនឹងការចោទប្រកាន់ពីបទឧក្រិដ្ឋ ពាក់ព័ន្ធនឹងការសម្លាប់រង្គាលលើលើសាវ័ករបស់ខ្លួន ។ 

រដ្ឋមន្រ្តីក្រសួងមហាផ្ទៃកេនយ៉ា លោក Kithure Kindikiនិយាយថា លោក Ezekiel Ombok Odero ដែលជាគ្រូគង្វាល​នៅព្រះវិហារ New Life Prayer ស្ថិតក្នុងទីក្រុង Mavueni តំបន់Kilifi បានប្រកាសពីការចាប់​ខ្លួននៅលើ​បណ្តាញព័ត៌មាន​សង្គម Twitter ប៉ុន្តែលោកពុំបានផ្តល់សេចក្តីលម្អិតបន្ថែមទៀតនោះទេ លើការចោទប្រកាន់ទល់នឹងលោក Odero ។ 

រដ្ឋមន្រ្តីរូបនេះ បានបង្ហោះនៅលើបណ្តាញព័ត៌មានសង្គម Twitter ថា ព្រះវិហារដូចបានបញ្ជាក់ខាងលើ ត្រូវបានបិទ ហើយមនុស្សជាង ១០០នាក់នៅក្នុងបរិវេណព្រះវិហារ ត្រូវបានជម្លៀសចេញ និងតម្រូវឲ្យធ្វើកំណត់ហេតុ ។ 

គួរឲ្យដឹងលោក Odero បានពពាយនាយលក់ថ្នាំទិព្វព្យាបាលជំងឺ ហើយលោកលក់ទឹកមន្តដែលលោកចាត់ទុកថា​ជាទឹកជប់ជីវិត និងកន្សែងដៃក្នុងតម្លៃ ១០០ស៊ីលីងកេនយ៉ាន(ប្រហែល ៧០សេន) ។ 

លោក Odero បាននិយាយប្រាប់សារព័ត៌មានក្នុងស្រុកអំឡុងបទសម្ភាសន៍ថា គ្មានអ្វីពិសេសនៅក្នុងដបនោះទេ ។ វាគឺជាទឹកបរិសុទ្ធ ។ ខ្ញុំប្រសិទ្ធីឲ្យវាពូកែ ។ ក្រណាត់ដែលលោក Paulប្រើប្រាស់នៅក្នុងព្រះគម្ពី បានព្យាបាលមនុស្ស​ជាច្រើន ។ ស្រមោលព្យាការី មាននូវអំណាចព្យាបាលផងដែរ ។ 

សូមបញ្ជាក់ថា ក្រុមអាជ្ញាធរកេនយ៉ា បានរកឃើញសាកសពសាវ័កចំនួន ៩៨នាក់ ក្នុងរយៈពេលប៉ុន្មានថ្ងៃចុងក្រោយ​នៃប្រតិបត្តិការគាស់ផ្នូររួម ៕ ដោយ ៖ សារ៉ាត់