រុស្ស៊ី ៖ មន្ត្រីនិយាយថា រុស្ស៊ីបាន បាញ់មីស៊ីលតម្រង់គោលដៅជាង២០គ្រាប់ និងយានដ្រូន២គ្រឿងចូលទីក្រុង គីវនិង​តំបន់ផ្សេងទៀតរបស់អ៊ុយក្រែននៅព្រឹកថ្ងៃសុក្រនេះ បណ្តាលឲ្យមនុស្ស៩នាក់ស្លាប់ និងវាយប្រហារ​ទៅលើអគារ​លំនៅឋាន ​ក្នុងទីក្រុងគីវភាគកណ្តាល។

យោងតាមរដ្ឋបាលទីក្រុងគីវ បានឲ្យដឹងថា ស៊ីរ៉ែនរោទិ៍ឡើងប្រកាសពីការវាយឆ្មក់តាមអាកាស ត្រូវបានលាន់ឮនៅ​ជុំវិញរដ្ឋធានី ក្នុងការវាយប្រហារលើកដំបូងមកលើទីក្រុងនេះ ក្នុងរយៈពេលជិត២ខែកន្លងទៅនេះ ហើយកងកម្លាំង​ទ័ពអាកាសអ៊ុយក្រែន បានស្ទាក់ចាប់មីស៊ីលតម្រង់គោលដៅចំនួន១១គ្រាប់ និងយានដ្រូនចំនួន២គ្រឿង នៅលើ​ទីក្រុងគីវ។

ពុំមានរបាយការណ៍ភ្លាមៗអំពីមីស៊ីលណាមួយ ដែលវាយប្រហារលើគោលដៅជាច្រើនក្នុងទីក្រុងគីវនោះទេ ប៉ុន្តែបំណែក​មកពីមីស៊ីលឬយានដ្រូនដែលស្ទាក់ចាប់បាន បានបំផ្លាញបណ្តាញអគ្គិសនី និងផ្លូវថ្នល់មួយខ្សែ នៅតំបន់ជិតខាង។ ពុំមានអ្នកស្លាប់ឬរងរបួសត្រូវបានរាយការណ៍នោះទេ។

នគរបាលជាតិអ៊ុយក្រែននិយាយថា នៅក្នុងទីក្រុង Uman មានចម្ងាយប្រមាណ២១៥គីឡូម៉ែត្រ ខាងត្បូងទីក្រុងគីវ មីស៊ីលតម្រង់គោលដៅ២គ្រាប់បានធ្លាក់លើអគារលំនៅឋានកម្ពស់៩ជាន់ បណ្តាលឲ្យមនុស្ស៦នាក់ស្លាប់ និង១៧នាក់រងរបួស។ កុមារ៣នាក់ត្រូវបានជួយសង្គ្រោះពីគំនរបាក់បែក។