ថៃ ៖ ក្រុមនគរបាលថៃបានចាប់ខ្លួនស្រ្តីម្នាក់សង្ស័យថាបានធ្វើឃាតមនស្សរាប់សិបនាក់ដោយប្រើប្រាស់សារធាតុ ពុលស៊ីយ៉ាណូហ្សែន ។ ​អ្នកស្រី Sararat Rangsiwuthaporn វ័យ ៣៦ឆ្នាំ ត្រូវបានឃុំឃាំងកាលពីថ្ងៃពុធ និងត្រូវបានគេច្រានចោល​ការដាក់ប្រាក់​តម្កល់ឲ្យនៅក្រៅឃុំ ។ 

ក្រុមនគរបាននិយាយថា ជនរងគ្រោះ ត្រូវបានគេស្គាល់ថាជាមិត្ត ឬជាមនុស្សជិតស្និតនឹងស្រ្តីម្នាក់នេះ ហើយភស្តុតាង​រកឃើញមកទល់នឹងពេលនេះ បង្ហាញថា ជនរងគ្រោះមានចំនួន ១៣នាក់ ទោះបីជាយ៉ាងណា​ក៏​ដោយ អ្នកស្រី Sararatបានច្រានចោលការចោទប្រកាន់ទាំងអស់នេះ នគរបាលនិយាយថា​ ពួកយើងមានភស្តុតាង​ពាក់ព័ន្ធនឹងស្រ្តីម្នាក់នេះ គឺភស្តុតាងសារធាតុពុលស៊ីយ៉ាណូហ្សែន ។ ដូច្នេះហើយវាមិនសំខាន់នោះទេថាតើពួកយើងបានរកឃើញភស្តុងតាង ឬមិនរកឃើញភស្តុតាងដើម្បីដាក់ការចោទប្រកាន់លើរូបនាង ។ ភស្តុតាងដែលពួកយើងមាន គឺច្បាស់លាស់​ថា​សារធាតុពុលស៊ីយ៉ាណូហ្សែន មានការជាប់ពាក់ព័ន្ធនឹងជនសង្ស័យ ។ 

សារព័ត៌មានក្នុងស្រុក បានរាយការណ៍ថា អ្នកស្រី Sararatបានក្លាយជាជនសង្ស័យ ក្រោយករណីស្លាប់​ដែលជាប់​សង្ស័យកាលពីថ្ងៃទី ១៤ ខែមេសា លើមិត្តភ័ក្តិរបស់គាត់ម្នាក់ បន្ទាប់ពីពួកគេរួមដំណើរជាមួយគ្នា ។ 

ក្រុមនគរបាលនិយាយថា របាយការណ៍កោសល្យវិច្ច័យសាកសព បង្ហាញថា សាកសពជនរងគ្រោះ មានផ្ទុក​សារធាតុស៊ីយ៉ាណូហ្សែន ។ ចាប់តាំងពីពេលនោះមក ក្រុមគ្រួសារជនរងគ្រោះមុនៗ បានមកដាក់ពាក្យបណ្តឹង ដោយពួកគេលើកឡើងថា ករណីស្លាប់មនុស្សជាទីស្រលាញ់របស់ពួកគេ គួរឲ្យសង្ស័យផងដែរ ៕ ដោយ ៖ សារ៉ាត់