សៀមរាប៖ អាជ្ញាធរជាតិអប្សរា បានរៀបចំដាក់តុឈើនៅតាមម្លប់ដើមឈើ ក្បែរៗប្រាសាទបុរាណសម្រាប់ភ្ញៀវទេសចរជាតិ និងអន្តរជាតិ ឱ្យពួកគាត់បានអង្គុយសម្រាកក្នុងពេលដើរទស្សនានឿយហត់ ដែលជាការយកចិត្តទុកដាក់ថ្មីមួយបន្ថែមទៀត ក្រៅតែពីការងារស្តារហេដ្ឋារចនាសម្ព័ន្ធ ការរៀបចំសណ្តាប់ធ្នាប់ ការរៀបចំសួន ដាំកូនឈើ សម្អាតបរិស្ថាន ថែទាំអភិរក្សប្រាសាទ និងការងារថែទាំបរិស្ថានក្នុងឧទ្យានអង្គរជាប្រចាំ។

លោក សេក វីដា ក្រុមការងារត្រួតពិនិត្យបរិក្ខារទេសចរណ៍ នៃនាយកដ្ឋានអភិវឌ្ឍន៍ទេសចរណ៍ និងវប្បធម៌ ឱ្យដឹងថា ក្រុមការងាររបស់លោកកំពុងមមាញឹករៀបចំធ្វើកៅអីឈើ​ដាក់នៅតាមម្លប់ដើម​ឈើចំនួន៤កន្លែងនៅប្រាសាទអង្គរវត្តសម្រាប់ឱ្យភ្ញៀវទេសចរជាតិនិងអន្តរជាតិ ​បាន​អង្គុយសម្រាក បន្ទាប់ពីពួកគាត់បានដើរទស្សនាប្រាសាទបុរាណ​ហត់នឿយ ​និង​ចុក​រួយជើង​ជាដើមនោះ។

ក្រៅពីប្រយោជន៍ដែលបានរៀបរាប់ខាងលើ ​កៅអីធ្វើពីបន្ទះឈើទាំងនេះ ក៏មាន​សារសំខាន់ជួយ​ការពារថ្មប្រាសាទ​ និងស្មៅនៅតាមប្រាសាទផង ព្រោះកន្លងមកភ្ញៀវទេសចរតែងតែទៅអង្គុយលើ​ថ្មប្រាសាទ ​ឬស្មៅនៅពេលពួកគាត់ដើរឆ្ងាយ ​ហត់ អស់កម្លាំង ដែលធ្វើឱ្យមានផលប៉ះពាល់​ដល់​ថ្មប្រាសាទ និងវាលស្មៅ។

ជាមួយគ្នានេះដែរលោក ឡេក គិមលីន ប្រធានគ្រប់គ្រងភ្នាក់ងារទេសចរណ៍​នៃអាជ្ញាធរជាតិអប្សរា​នៅ​ប្រាសាទអង្គរវត្ត ​ក៏បានឱ្យដឹងដែរថា ការរៀបចំធ្វើកៅអីឈើសម្រាប់ឱ្យភ្ញៀវទេសចរ​បានអង្គុយសម្រាកនេះ មានការគាំទ្រពីភ្ញៀវទេសចរជាច្រើន។ «កៅអីធ្វើពីបន្ទះឈើវែងៗទាំងនេះ បានជួយឱ្យភ្ញៀវទេសចរបានអង្គុយ​សម្រាក​បន្ធូរអារម្មណ៍​បំបាត់ការនឿយហាត់មួយអន្លើ បន្ទាប់ពីពួកគាត់បានដើរឆ្ងាយ ​ហត់ អស់កម្លាំង​ និងចុករួយជើងអំឡុងពេលទស្សនាប្រាសាទ ជាពិសេសភ្ញៀវទេសចរដែលមានវ័យចំណាស់»។

សូមជម្រាបថា អាជ្ញាធរជាតិអប្សរា ក៏​បាន រៀបចំកម្រាលក្ដារផ្លូវថ្មើរជើង នៅបរិវេណប្រាសាទ​អង្គរវត្តនេះផងដែរ។កម្រាលផ្លូវដើរថ្មី ​ដែលអាជ្ញាធរជាតិអប្សរា ធ្វើការរៀបចំនេះ មានចំនួន៤កន្លែង​ផ្សេងគ្នា ចំណែកកម្រាលឈើចាស់ ក៏នៅរក្សាទុកដដែល ​គោលដងចម្បងដើម្បីកាត់បន្ថយភាព​សឹករិចរឹលនៃថ្មប្រាសាទ ​ដោយសារកន្លងមក ​ជាពិសេសរដូវវស្សាមានភ្លៀងធ្លាក់ បណ្តាលឱ្យមាន​ភក់ជាប់មកជាមួយនូវបាតស្បែកជើង ជាហេតុនាំយកដី ទាំងនោះទៅកកិតជាមួយនឹងថ្ម។ ម្យ៉ាងទៀតគឺដើម្បីគ្រប់គ្រងលំហូររបស់ភ្ញៀវទេសចរឱ្យសមរម្យ ចៀសវាងការដើរនៅលើស្មៅ និងលើដី រក្សាបានរបៀបរៀបរយ និងរួមចំណែកលើកកម្ពស់សោភណ្ឌភាពប្រាសាទអង្គរវត្ត ឱ្យមានភាពបៃតងគ្រប់រដូវកាល៕អត្ថបទ៖ ឈិត សាវី