រដ្ឋាភិបាលបាននិយាយកាលពីថ្ងៃព្រហស្បតិ៍ថា កងកម្លាំងប្រដាប់អាវុធប្រទេសកូឡំប៊ី រឹបអូសបានថ្នាំញៀនកូកាអ៊ីន ចំនួន ១០,២តោន មានតម្លៃ ៣៤០លានដុល្លារ ក្នុងប្រតិបត្តិការផ្សេងៗគ្នា នៅសមុទ្រការ៉ាអ៊ីប និងនៅតាមបណ្តោយព្រំដែនជាមួយប្រទេសវ៉េណេហ្ស៊ុយអេឡា។

ដំបូង ថ្នាំញៀន៥,៥តោន ត្រូវបានរឹបអូស និងមនុស្ស៩នាក់ត្រូវបានឃុំខ្លួន អំឡុងប្រតិបត្តិការខុសៗគ្នាចំនួន៣ ក្នុងកិច្ចសហប្រតិបត្តិការជាមួយសហរដ្ឋអាមេរិក និងប្រទេសប៉ាណាម៉ា។ អ្នកដែលត្រូវបានចាប់ខ្លួន បានព្យាយាមគេចខ្លួន ក្នុងការដេញតាមចាប់ដោយអូប័រល្បឿនលឿន។

មេបញ្ជាការរងកងទ័ពជើងទឹក នៃទីបញ្ជាការកងកម្លាំងកងទ័ពជើងទឹកតំបន់ការ៉ាអ៊ីប លោក Hernando Mattos និយាយថា នេះគឺជាការរឹបអូសបានសារធាតុក្លអ៊ីដ្រាតកូកាអ៊ីនច្រើនបំផុត ដែលបានធ្វើឡើងនៅក្នុងតំបន់ការ៉ាអ៊ីប ក្នុងឆ្នាំ២០២៣នេះ។

ក្នុងការរឹបអូសលើកទី២ នគរបាលជាតិប្រទេសកូឡំប៊ី រួមជាមួយកងទ័ព បានរកឃើញមន្ទីរពិសោធកែច្នៃកូកាអ៊ីន នៅកណ្តាលព្រៃ ក្នុងតំបន់ Tibu តាមព្រំដែនជាមួយប្រទេសវ៉េណេស៊ុយអេឡា ជាកន្លែងដែលពួកគេរឹបអូសបាន កូកាអ៊ីន ៤,៧តោន ជាកម្មសិទ្ធរបស់ក្រុមកងទ័ពរំដោះជាតិ(ELN)។